زۆرجار چارەخواز بە نیشانەکانی وەک ئاوسانی دەم وچاو و دەست و قاچ سەردانمان دەکات. پشکنینەکانمان دەریدەخەن کە دوچاری ئەم  جۆرە لە هەوکردن بونەتەوە کە بەهەوکردنی یەکەکانی پاڵاوتنی گورچیلە ناودەبرێت به‌(Glomerulus) گلۆمێرولەس بەشێکە لە خانەی گورچیلە و ئەرکی پاڵاوتنی خوێنە لە شلەی زیادە و پاشەڕۆکان، بەمانایەکی تر خوێن لە پاشەڕۆ ژەهراویەکان پاکدەکاتەوە. لەبەر ئەوە هەر تەنگوچەڵەمەیەک لەم کردارەدا گرفتی تەندروستی گەورەی لێدەکەوێتەوە، دكتۆر گۆران پسپۆڕی نەشتەرگەری گورچیلە و میزەڕۆ باس له‌ نیشانه‌كانی ئه‌م نه‌خۆشییه‌ ده‌كات.

هەوکردنی یەکەکانی پاڵاوتن دەکرێت حاڵەتێکی لەناکاو یاخود درێژخایەن بێت، یان دەکرێت بەهۆی نەخۆشیە درێژخایەنەکانی وەک شەکرە ڕوبدات. بەڵام لەهەموی سەرەکیتر دەستنیشانکردنی زوبەزوی حاڵەتەکە و هۆکارەکانیەتی چونکە ئەگەر هەوکردنەکە زۆربخایەنێت و چارەسەرنەکرێت ئەوا زیانی هەمیشەیی بە گورچیلە دەگەیەنێت.

نەخۆش لەکاتی هەبونی ئەم نیشانانەدا پێویستە سەردانی پزیشکی پسپۆر بکات:

1- هەبونی خوێن لە میزدا

2- هەبونی کەف لە میزدا

3- بەرزی پەستانی خوێن

4- ئاوسانی دەم و چاو، دەستەکان، قاچ یان سک.

هۆکارەکانی توشبون یان زیادکردنی ئەگەری توشبون:

1- دەکرێت دوای هەوکردنی قورگ ڕوبدات.

2- دەکرێت دوای هەوکردنی پەردەی دڵ ڕوبدات

3- بەهۆی ڤایرۆسەکانی جگەر

4- بەهۆی نەخۆشیەکانی سیستەمی بەرگری

5- نەخۆشیە درێژخایەنەکان وەک شەکرە و زەخت

هه‌نگاوه‌كانی خۆپاراستن:

1- پابەندبە بە پلانی چارەسەر ئەگەر توچاری هەرجۆرێک لە هەوکردن بویتەوە

2- چاودێری پەستانی خوێنت بکە

3- چاودێری ڕێژەی شەکری خوێنت بکە