مەسرور بارزانی و باڵیۆزی به‌ریتانیا پێكهێنانی حكومه‌تی هه‌رێمیان تاووتوێ كرد
مەسرور بارزانی و باڵیۆزی بەریتانیا
وێستگه نیوز ـ
مه‌سرور بارزانی، راوێژكاری ئه‌نجومه‌نی ئاسایشی هه‌رێمی كوردستان له‌گه‌ڵ باڵیۆزی به‌ریتانیا له عیراق كۆبوه‌وه و هه‌نگاوه‌كانی پێكهێنانی حكومه‌تی هه‌رێمیان تاووتوێ كرد.
ئەمڕۆ یەكشەممه 9ی كانوونی یه‌كه‌می 2018، مەسرور بارزانی، راوێژكاری ئەنجومەنی ئاسایشی هەرێمی كوردستان پێشوازی لە جۆن وێڵكس، باڵیۆزی بەریتانیا لە عیراق و شاندێكی یاوەری كرد.
لە دیدارێكدا كە مارتن وار، كونسوڵی گشتی بەریتانیا لە هەرێمی كوردستان ئامادەی بوو، دوا پەرەسەندنەكانی ناوچەكە و هەوڵ و هەنگاوەكانی پێكهێنانی حكومەتی هەرێمی كوردستان و هاتنە ئارای قۆناغی نوێی پێوەندی نێوان هەولێر و بەغدا تاوتوێ كرا.
هه‌ر له دیداره‌كه‌دا مەسرور بارزانی، قۆناغی نوێی په‌یوەندی نێوان هەولێر و بەغدای بە هەڵدانەوەی لاپەڕەیەكی تازە لە قەڵەم دا و هیوای خواست لە ئایندەیەكی نزیكدا بە گرتنەبەری دیالۆگ و گفتوگۆی بنیاتنەر پرسە هەڵواسراوەكان چارەسەر بكرێن و زەمینە بۆ چەسپاندنی ئاشتی و پێشخستنی وڵات و دابینكردنی خزمەتگوزارییە بنەڕەتییەكان بڕەخسێنێت.
باڵیۆزی بەریتانیا وێڕای پیرۆزبایی لە مەسروور بارزانی بەبۆنەی كاندیدكردنی بۆ سەرۆكایەتی حكومەتی هەرێمی كوردستان، هیوای سەركەوتنی بۆ خواست و دووپاتی لەوە كردەوە كە وڵاتەكەیان هاوكار دەبێت بۆ ئەوەی هەرێمی كوردستان ئاوەدانی و پێشكەوتنی زیاتر بە خۆیەوە ببینێت.
هــ. ر
PM:01:45:09/12/2018
ئه‌م بابه‌ته 3240
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت