توێژینەوەیەک نهێنی خۆپاراستن لە شەکرەی جۆری دوو ئاشکرادەکات
وێستگە ستایل-
نوێترین توێژینەوە ئاشکرایکردووە کە پەیڕەوکردنی ژەمە خۆراکییە کالۆرییە نزمەکان هاوکات لەگەڵ ئەنجامدانی ڕاهێنانە وەرزشییەکان بە شێوەیەکی ڕێکخراو دەکرێت کاریگەری ئەرێنی هەبێت لەسەر تەندروستی مرۆڤ و ببێتە هۆی ڕێگریکردن لە دووچاربوون بە نەخۆشی شەکرەی جۆری دووهەم بە تایبەت لەو کەسانەی قەڵەون و تەمەنیان لە نێوان 55 بۆ 75 ساڵیدایە.
دکتۆر فرانک هو پڕۆفیسۆری بواری خۆراک و توێژینەوەی زانستی لە کۆلێژی Harvard T.H بۆ تەندروستی گشتی لە ویلایەتی بۆستنی ئەمریکا ڕایگەیاند ئەم توێژینەوەیە دەریدەخات کە پابەندبوونی خەڵک بە شیوازێکی ژیانی تەندروست دەکرێت ڕێگریبکات لە دووچاربوونی ملیۆنەها کەس بە نەخۆشی شەکرەی جۆری دووهەم لە سەرتاسەری جیهاندا.
بە گوێرەی ئەم توێژینەوەیە کە لە بەرواری 25 ی ئاب لە گۆڤاری "Annals of Internal Medicine" بڵاوکراوەتەوە ئەو کەسانەی توانیویانە کە پەیڕەوی ڕێجیمی ژەمە خۆراکییە کەم کالۆرییەکان و وەرزشی ڕۆژانە بکەن بە ڕێژەی %31 دوورکەوتونەتەوە لە تووشبوونیان بە نەخۆشی شەکرەی جۆری دووهەم، جگە لەوەش ئەو کەسانە ڕێژەیەکی باش لە چەوری جەستە و کێشی زیادەی لەشیان داگرتووە.
دەرەنجامی ئەم توێژینەوەیە دەکرێت کاریگەرییەکی زۆر باشی هەبێت لە کەمبوونەوەی ڕێژەی نەخۆشانی شەکرە لە داهاتوویەکی نزیکدا لە جیهاندا، بەمەش خەڵکی بەدووردەبن لە ماکەکانی ئەم نەخۆشییە.
PM:03:23:31/08/2025
ئه‌م بابه‌ته 172
جار خوێنراوه‌ته‌وه