ئەو تابلۆ هونەرییە یەکێکە لە تابلۆ ناوازەکانی هونەرمەندی ئیتاڵی جۆزێبی ڤیتۆری غیسلاندی کە ناوی "وێنەی خانمێک" ی لێناوە، ئەو تابلۆیە بەشێک بووە لە کۆمەڵێک کاری هونەری وێنەکێشی جووی هۆڵەندی جاک غودستیکەر کە زیاتر لە 1,100 کاری هونەری لێدزراوە دوا بە دوای داگیرکردنی هۆڵەندا لە لایەن نازییەکانەوە لە ساڵی 1940دا، زۆرینەی ئەو کارە هونەریانە لە لایەن گەورە بەرپرسانی نازیەوە دزراون بەناوبانگترینیان هێرمان گۆرینگە.

جێگەی ئاماژەیە ئەم تابلۆیە لە لایەن تیمێکی لێکۆڵەڕی ڕۆژنامەی "Alegman Dagblad" ی هۆڵەندییەوە دۆزراوەتەوە لە پاش چەندین ساڵ لە چاودێریکردنی فریدریش راجین کە ڕاوێژکاری بوای دارایی هێرمان گۆرینگی گەورە بەرپرسی نازییەکان بووە، فریدریش لە پاش دزینی چەندین گەوهەری بەنرخ و دوو تابلۆی گرانبەها هەڵهاتووە بۆ ئەمریکای باشوور و لەوێ نیشتەجێبووە.

تابلۆکە بەڕێکەوت لە یەکێک لە وێنەکانی خانوویەکدا بینراوە کە دانراوە بۆ فرۆشتن، لای خۆیەوە دەزگای کەلەپور و کەلوپەلی کلتوری هۆڵەندی(REC) لە میانەی بەراوردکردنی وێنەی تابلۆکە لەگەڵ دۆکیومێنتە هەڵگیراوەکان ئاشکرایکرد هەموو تایبەتمەندییەکانی تابلۆ دزراوەکە لەگەڵ تابلۆی وێنەکەدا هاوشێوەی یەکترن، بەڵام پێویستە بە وردی لێکۆڵینەوە بکەین تاوەکو بگەینە دەرەنجامێکی ڕاست و دروست.