ویڵ سمێث ڕووبەڕووی ڕەخنەیەکی زۆری هەوادارەکانی دەبێتەوە
وێستگە ستایل-
ئەکتەر و ڕاپەڕی ئەمریکی ویڵ سمێث لە پاش بڵاوکردنەوەی کورتە دیمەنێک لە پەڕەی فەرمی خۆی لە کەناڵی YouTube، ڕووبەڕووی ڕەخنەیەکی زۆری هەوادارەکانی بۆوە و بە بەکارهێنانی زیرەکی دەستکرد تۆمەتبارکرا.
کورتە دیمەنەکەی ئەو ئەستێرەیە ژمارەیەکی یەکجار زۆر لە خەڵکی تێدایە کە هەڵگری چەندین دروشمی کاریگەرن و بەشێکی دیکەیان وا دەردەکەوێت کە چاویان پڕ فرمێسکە و دەگرین، ئەمە جگە لەوەی لە هەندێک لە دیمەنەکاندا ڕووخساری خەڵکەکە شێواوی پێوە دیارە و لە هەندێکی دیکەشدا ئەستێرە ڕاپەرەکە بە 6 پەنجەوە دەردەکەوێت.
سمێث ئەم ڤیدیۆیەی بەر لە دەستپێکی کۆنسێرتەکانی خۆی لە کەناڵی فەرمی YouTubeەکەی بڵاوکردۆتەوە و لەسەری نووسیوە" بەشی دڵخوازی من لە گەڕان و کۆنسێرتەکانمدا بینینی ئێوەیە لە نزیکەوە"، جێگەی باسە ئەم ڤیدیۆیە هەر زوو مشتومڕی هەوادارەکانی ئەو ئەستێرەی بە دوای خۆیدا هێنا و ئەوان ویڵ سمێث بە بەکارهێنانی زیرەکی دەستکرد تۆمەتباردەکەن.
ویڵ سمێث ناوی تەواوی ویلارد کارۆل سمێثە و یەکێکە لە هونەرمەندە ئەمریکییە بەناوبانگەکانی جیهان، ئەو ئەستێرەیە لە هەمان کاتدا ئەکتەر، نووسەر، بەرهەمهێنەری فیلم و ڕاپەڕیشە، سمێثی تەمەن 56 ساڵ لەدایکبووی ویلایەتی پەنسلڤانیایە و خاوەنی خەڵاتی ئۆسکارە.
PM:03:00:27/08/2025
ئه‌م بابه‌ته 744
جار خوێنراوه‌ته‌وه