واده‌ی هاتنی شه‌پۆلێكی گه‌رما بۆ عیراق راگه‌یه‌ندرا

‌شەپۆلێکی گەرما عیراق دەگرێتەوە

وێستگه‌ نیوز ـ
ده‌سته‌ی كه‌شناسیی عیراق راگه‌یه‌ندراوێكی له‌سه‌ر هاتنی شه‌پۆلێكی گه‌رمای به‌هێز بۆ وڵاته‌كه‌ی راگه‌یاند و ئاماژه‌ی به‌وه‌دا له‌ رۆژی چوارشه‌ممه‌ی داهاتووه‌وه‌ پله‌كانی گه‌رما له‌ وڵاتدا به‌رزده‌بێته‌وه‌ و له‌ به‌غداش ده‌گاته‌ 43 پله‌ی سیلیزی و له‌ به‌سڕه‌ش ده‌بێته‌ 45 پله‌.


مه‌حمود عه‌بدولـله‌تیف، سه‌رۆكی‌ پێشبینیكه‌ران له‌ ده‌سته‌ی‌ كه‌شناسی عیراق بە سۆمەرییە نیوزی راگەیاندووە، له‌ رۆژی‌ چوارشه‌ممه‌ی‌ داهاتوه‌وه‌ 15ی ئایاری 2019، كاریگه‌ری‌ نزمه‌پاڵه‌په‌ستۆی وه‌رزیی گه‌رما، عیراق ده‌گرێته‌وه‌ و پله‌كانی‌ گه‌رما ده‌گه‌نه‌ سه‌روو 40 پله‌ی سەدی.

سەرۆکی دەستەكه‌ دەشڵێت: "به‌پێی‌ پێشبینیه‌كان به‌رزترین پله‌كانی‌ گه‌رما له‌و رۆژه‌دا له‌ به‌غدا 41 پله‌ و له‌ موسڵ 40 پله‌ و له‌ به‌سڕه‌ 43 پله‌ی سیلیزی ده‌بن، رۆژی‌ دواتریش پله‌كانی‌ گه‌رما زیاتر به‌رزده‌بنه‌وه‌ و له‌ به‌غدا ده‌گاته‌ 43 پله‌، له‌ موسڵ 41 پله‌ و له‌ به‌سڕه‌ش 45 پله‌ ده‌بێت".

ئه‌وه‌شی وتووه‌: ئەو شەپۆلی گەرمایە ناوی "هیندی‌ مۆنسۆن"، كه‌ شه‌پۆلێكی وه‌رزییه‌ و به‌درێژایی‌ هاوین به‌رده‌وام ده‌بێت.

هــ. ر


AM:09:07:11/05/2019


ئه‌م بابه‌ته 8504 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت

زۆرترین خوێندراو