گێزەر؛ تەنیا بۆ چاو نییە؛ دۆزینەوەی سوودە شاراوەکانی بۆ دڵ و پێست

وێستگە ستایل – سۆلین عوسمان

هەموومان لە منداڵییەوە بیستوومانە کە "گێزەر بۆ چاو باشە"، بەڵام توێژینەوەیەکی نوێی زانستی دەریخستووە کە سوودەکانی ئەم سەوزە ڕەنگاوڕەنگە زۆر لەوە زیاترن کە پێشتر دەمانزانی. گێزەر ئێستا وەک پارێزەرێکی بەهێزی کۆئەندامی سووڕانی خوێن و دڵ سەیر دەکرێت.

بەپێی توێژینەوەکە، خواردنی بەردەوامی گێزەر دەبێتە هۆی باشترکردنی نیشانە گشتییەکانی تەندروستی دڵ، لەوانە دابەزاندنی ئاستی کۆلیسترۆڵی زیانبەخش و کەمکردنەوەی "تەقینەوەی ئۆکسجینی" لە ناو خانەکاندا. ئەمەش بەهۆی بوونی ڕێژەیەکی زۆری دژە ئۆکسێنەرەکانی وەک (بێتا-کارۆتین) و (پۆلیفینۆڵەکان). ئەم ماددانە نەک تەنیا چاو لە تێکچوون دەپارێزن، بەڵکو ڕێگری لە ڕەقبوونی دەمارەکانی خوێنیش دەکەن.

جگە لەمانە، توێژینەوەکە ئاماژە بەوە دەکات کە گێزەر ڕۆڵێکی گرنگی هەیە لە پاراستنی گەنجێتی پێست و بەهێزکردنی کۆئەندامی بەرگری، بە تایبەت کاتێک لەگەڵ بڕێک چەوری تەندروست (وەک زەیتی زەیتوون) دەخورێت، چونکە چەورییەکە یارمەتی جەستە دەدات ڤیتامینەکان بە باشترین شێوە بمژێت. گێزەر کە مێژووی چاندنی بۆ زیاتر لە هەزار ساڵ پێش ئێستا دەگەڕێتەوە، لە سەرەتادا وەک دەرمان بەکارهاتووە. ئەم دۆزینەوە نوێیانە دووپاتی دەکەنەوە کە پێویستە ئەم سەوزەیە ببێتە بەشێکی سەرەکی و دانەبڕاو لە ژەمە خۆراکییەکانی ڕۆژانەمان بۆ ئەوەی جەستەمان لە نەخۆشییە جیاوازەکان بپارێزین.

سەرچاوە: گۆڤاری کیمیای زیندەیی خۆراک، کۆنسۆرتیۆمی جیهانیی خوێندنەوەی خۆراک