فیلمی (One Battle After Another) مێژووی خەڵاتەکانی ئەکتەران دەگۆڕێت و حەوت ڕیکۆرد دەشکێنێت

وێستگە ستایل - سۆلین عوسمان

فیلمی نوێی دەرهێنەری ناودار پۆڵ تۆماس ئاندەرسن، بە ناونیشانی (One Battle After Another)، توانی لە ڕاگەیاندنی لیستی بەربژێرانی خەڵاتەکانی ساڵانەی ئەکتەران (SAG Awards) بۆ ساڵی 2026، ڕیکۆردێکی مێژوویی و بێپێشینە تۆمار بکات. فیلمەکە بە بەدەستهێنانی حەوت بەربژێربوونی جیاواز، بووە یەکەمین بەرهەم لە مێژووی 31 ساڵەی ئەم خەڵاتەدا کە بگاتە ئەو ئاستە، ئەمەش وەک ئاماژەیەکی بەهێز بۆ سەرکەوتنی گەورەی فیلمەکە لە وەرزێ خەڵاتەکانی ئەمساڵدا دەبینرێت.

رۆژی چوارشەممە، سەندیکای ئەکتەرانی شاشە و فیدراسیۆنی هونەرمەندانی تەلەڤزیۆن و رادیۆ (SAG-AFTRA) لیستی کۆتایی بەربژێرەکانیان بۆ خەڵاتە ڕێزلێنانەکانیان ڕاگەیاند. لە کاتێکدا لە سێ دەیەی ڕابردوودا هیچ فیلمێک نەیتوانیبوو زیاتر لە پێنج بەربژێربوون بەدەستبهێنێت، فیلمەکەی ئاندەرسۆن بە حەوت جار ناوهێنانی لە لیستە جیاوازەکاندا، هەمووانی سەرسام کرد و پێگەی خۆی وەک بەهێزترین پاڵێوراوی ساڵ جێگیر کرد. ئەم خەڵاتانە کە لەلایەن خودی ئەکتەرەکانەوە بۆ هاوپیشەکانیان دیاری دەکرێن، بە یەکێک لە باوەڕپێکراوترین پێوەرەکان بۆ پێشبینیکردنی براوەکانی ئۆسکار دادەنرێن.

جگە لە بەربژێربوونی بۆ خەڵاتی "باشترین دەستەی نواندن" کە باڵاترین خەڵاتی ئەم مەراسیمەیە، فیلمی (One Battle After Another) توانی لەسەر ئاستی تاکەکەسییش سەرکەوتنی گەورە بەدەستبهێنێت. لیۆناردۆ دیکاپریۆ وەک باشترین ئەکتەری پیاو و چەیس ئینفینیتی وەک باشترین ئەکتەری ژن ناویان لە لیستەکەدا هاتووە. هەروەها لە بەشی ئەکتەرانی پاڵپشتدا، هەریەکە لە بێنیسیۆ دێل تۆرۆ، شۆن پێن و تەیانا تایلۆر بەربژێر کراون، شانبەشانی تیمی نمایشە مەترسیدارەکانی فیلمەکە کە ئەوانیش پشکی خۆیان لەم ڕیکۆردە مێژووییەدا هەبووە.

گرنگیی ئەم بەربژێربوونانە تەنها لە ژمارەکەیاندا نییە، بەڵکو لەو کاریگەرییەدایە کە لەسەر خەڵاتی ئۆسکار هەیانە. بەپێی ئامارە مێژووییەکان، بەدەستهێنانی بەربژێربوون لە بەشی "باشترین دەستەی نواندن" مەرجێکی بنەڕەتییە بۆ ئەوەی فیلمێک بتوانێت ئۆسکاری باشترین فیلم بباتەوە. لە ماوەی 30 ساڵی ڕابردوودا، تەنها چوار فیلم توانیویانە بەبێ ئەوەی لێرە بەربژێر بن، لە ئۆسکاردا خەڵاتە گەورەکە بەرنەوە. ئەمەش وادەکات فیلمەکەی ئاندەرسۆن و ڕکابەرەکانی وەک (Sinners, Hamnet, Marty Supreme, Frankenstein) لە ئێستاوە وەک پاڵەوانانی ئۆسکاری 2026 سەیر بکرێن.

لە لایەکی دیکەوە، ئەمساڵ تێبینی هەندێک دوورخستنەوەی چاوەڕواننەکراو کرا، بەتایبەت فیلمی نەرویجی (Sentimental Value) کە سەرەڕای ئەوەی پێشبینی دەکرا ئەکتەرەکانی وەک ڕێناتە ڕێینسڤێ و ستێلان سکارسگارد کێبڕکێی توند بکەن، بەڵام لە لیستەکەدا دەرکەوتن. بەربژێرەکان لە لۆس ئەنجلس لەلایەن هەردوو ئەکتەر جانێل جەیمس و کۆنۆر ستۆری ناسێندران و بڕیارە ململانێیەکی توند لە نێوان ئەستێرەکانی وەک تیمۆسی شالامێ، مایکل بی جۆردن، ئیسان هۆک و جێسی پلیمۆنس لەلایەک، و جێسی بەکڵی، ڕۆز بێرن و ئێما ستۆن لە لایەکی دیکەوە بەڕێوەبچێت.

مەراسیمی دابەشکردنی خەڵاتەکانی ئەکتەران لە ڕێکەوتی 1ی ئاداری 2026، لە هۆڵی شاین لە شاری لۆس ئەنجلس سازدەکرێت. ئەم بۆنە گەورەیە بە شێوەیەکی ڕاستەوخۆ لە ڕێگەی سەکۆی جیهانی "نێتفلێکس"ەوە پەخش دەکرێت، کە چاوەڕوان دەکرێت بینەرێکی بێشوماری هەبێت. یەکێک لە ساتە هەرە پڕبایەخەکانی ئەو شەوەش، بەخشینی خەڵاتی "دەستکەوتی تەمەن" دەبێت بە ئەکتەری ناوداری جیهانی، هاریسن فۆرد، وەک ڕێزلێنانێک بۆ مێژووە پڕ لە داهێنانەکەی لە سینەمای جیهانیدا.

سەرچاوە: ئاژانسە هەواڵییە جیهانییەکان - بەشی هونەر و سینەما

AM:11:28:08/01/2026

ئه‌م بابه‌ته 216 جار خوێنراوه‌ته‌وه‌‌