ولایه‌ته یه‌كگرتووه‌كانی ئه‌مریكا فه‌رمانی بۆ ژماره‌یه‌ك كارمه‌ند له نوێنه‌رایه‌تییه‌كانی خۆی له عیراق و هه‌رێمی كوردستان ده‌كرد له شوێنی كاره‌كانیان بكشێنێته‌وه و بگه‌ڕێنه‌وه ئه‌مریكا.
به‌پێی راگه‌یه‌ندراویَكی وه‌زاره‌تی ده‌ره‌وه‌ی ئه‌مریكا، فه‌رمان بۆ ئه‌و كارمه‌ندانه دەرکراوە کە لە نوێنەرایەتییەکانی باڵیۆزخانەی ئەمریکا لە بەغدا و کۆنسوڵخانەی ئەمریکا لە هەولێر کاردەکەن و مانه‌وه‌یان پێویست نییه، بگه‌ڕێنه‌وه ئه‌مریكا و عیراق و هەرێم جێبهێڵن.
وه‌زاره‌تی ده‌ره‌وه‌ی ئه‌مریكا، هۆكاری ده‌ركردنی ئه‌و فه‌رمانه‌ی بۆ ئه‌وه گه‌ڕاندوه‌ته‌وه كه میلیشیاكان هه‌ڕه‌شه‌ن بۆ سه‌ر هاوڵاتییانی ئه‌مریكا و رۆژئاواو به‌رژه‌وه‌ندییه‌كانییان.
هه‌ر له راگه‌یه‌ندراوه‌كه‌دا وه‌زاره‌تی ده‌ره‌وه‌ی ئه‌مریكا، به شێوه‌یه‌كی كاتی پێدانی ڤیزای له نوێنه‌رایه‌تییه‌كانی خۆی له عیراق و هه‌رێمی كوردستان راگرتووه.
ئه‌وه‌ش له‌كاتێكدایه رۆژی یەکشەممە 12ی ئایاری 2019، باڵیۆزخانه‌ی ئه‌مریكا له به‌غدا لە بەیاننامەیەکدا رایگه‌یاند" ئامۆژگاریی سەرجەم هاوڵاتیانی ئەمریکا دەکەین له زیادبوونی ئاڵۆزییەکان لە عیراق، بۆیە دەبێت لەو بارەیەوە ئاگاداربن".
باڵیۆزخانه‌كه داواشی لە هاوڵاتیانی وڵاتەکەی کردووە لەم کاتەدا سەردانی عیراق نەکەن، هاوكات داواشی لە هاوڵاتییانی خۆی لە عیراق كردوه بۆ هەر زانیارییەکی زیاتر سەردانی ماڵپەڕی باڵیۆزخانەکە بکەن لە بەشی خزمەتگوزاریی تایبەت بە هاوڵاتیانی ئەمریکا.
ناوبە ناو باڵیۆزخانەی ئەمریکا لە بەغدا هۆشداری دەداتە هاوڵاتیانی خۆی لە عیراق کە ئاگاداری خۆیان بن لە بوونی ئەگەری هێرشکردن بۆ سەر بنکە و بارەگاکانی وڵاته‌كه‌ی.
ئەو هۆشدارییە نوێیەی باڵیۆزخانەی ئەمریکا لە بەغدا لە کاتێکدایە، ئاڵۆزییەکانی نێوان واشنتن و تاران ڕۆژ لە دوای ڕۆژ لە پەرەسەندندایە و ژمارەیەک لە لێپرسراوان و پەرلەمانتارانی عیراقیش به‌پێویستی ده‌زانن بەغدا خۆی لە ئاڵۆزییەکانی نێوان ئێران و ئەمریکا بە دووربگرێت و خۆی نەکاتە لایەنێک لەو ناکۆکیانەدا.
AM:11:07:15/05/2019