‌بارزانی په‌یامێك ئاراسته‌ی یه‌كێتی ئافره‌تانی كوردستان ده‌كات

 وێستگه‌ نیوز- 

سه‌رۆكی‌ پارتی‌ دیموكراتی‌ كوردستان پیرۆزبایی‌ ساڵیادی‌ دامه‌زراندنی‌ یه‌كێتی‌ ئافره‌تانی‌ كوردستان ده‌كات و ده‌ڵێت، له‌ قۆناغی ئێستادا ئه‌ركی یه‌كێتی ئافره‌تان له‌ هه‌موو كاتێك هه‌ستیارتره‌.  

مه‌سعود بارزانی‌، سه‌رۆكی‌ پارتی‌ دیموكراتی‌ كوردستان به‌بۆنه‌ی‌ 65 ساڵه‌ی‌ یادی‌ یه‌كێتی‌ ئافره‌تانی‌ كوردستان په‌یامێكی‌ بڵاوكردۆته‌وه‌ و رایگه‌یاندووه‌، گه‌رمترین پیرۆزبایی ئاڕاسته‌ی سكرتێر و ئه‌ندامانی یه‌كێتی ئافره‌تان و هه‌موو ئافره‌تانی كوردستان ده‌كات.  

بارزانی‌ ئاماژه‌ی‌ به‌وه‌كردووه‌، رۆڵی یه‌كێتی ئافره‌تان له‌ خه‌بات و تێكۆشانی گه‌لی كوردستان له‌ هه‌موو قۆناغه‌كاندا گرنگ و كاریگه‌ر بووه‌، له‌گه‌ڵ ئه‌وه‌شدا به‌شی هه‌ره‌ گه‌وره‌ی ئێش و ئازاری گه‌له‌كه‌مان له‌سه‌ر شانی ئافره‌تان بووه‌ و ڕۆڵێكی مه‌زنیان له‌ خه‌بات و قوربانیدانی گه‌لی كوردستاندا هه‌بووه‌. 

بارزانی‌ روونیكردۆته‌وه‌، له‌ قۆناغی ئێستادا ئه‌ركی یه‌كێتی ئافره‌تانی كوردستان له‌ هه‌موو كاتێك هه‌ستیارتره‌، پێویسته‌ یه‌كێتی ئافره‌تان ببنه‌ سه‌رچاوه‌ی هۆشیاریی نه‌ته‌وه‌یی و نیشتیمانی و پێگه‌یاندن بۆ ئافره‌تان له‌ پشتیوانیكردنی دۆزی ڕه‌وای گه‌لی كوردستان و پێشمه‌رگه‌ و رروبه‌ڕوبوونه‌وه‌ی ئه‌و ته‌حه‌دیاته‌ی كه‌ له‌به‌رده‌م گه‌لی كوردستانه‌.  

سه‌رۆكی‌ پارتی‌ هیواداره‌ ئه‌و یاده‌ ده‌رفه‌تێك بێت بۆ ئه‌وه‌ی یه‌كێتی ئافره‌تان به‌ گوڕوتینێكی زیاتره‌وه‌ كار بۆ كه‌مكردنه‌وه‌ و نه‌هێشتنی ئێش و ئازاری ئافره‌تان و پاراستنی مافه‌كانیان له‌نێو خێزان و شوێنی كار و له‌ناو هه‌موو كایه‌كانی كۆمه‌ڵگه‌دا بكه‌ن.


PM:09:44:11/12/2017


ئه‌م بابه‌ته 1476 جار خوێنراوه‌ته‌وه‌‌


زۆرترین خوێندراو