غه‌یاس سورچی، لێپرسراوی راگه‌یاندنی مه‌ڵبه‌ندی موسڵی یه‌كێتی نیشتمانی كوردستان به وێستگه نیوزی راگه‌یاند: تا ئێستا هیچ چه‌كدارێكی حه‌شدی شه‌عبی و سوپای عیراق له ناوچه كوردییه‌كانی ده‌شتی نه‌ینه‌وا نه‌كشاونه‌ته‌وه.
وتیشی: "ئه‌وه‌ی هه‌یه حه‌شدی شه‌عبی له چه‌ند شوێنێكی كه‌ركوك و خانه‌قین و گه‌رمه‌سێر كشاونه‌ته‌وه، به‌ڵام هێشتا له ناو شنگال و باشیك و مه‌خمور و گوێر ماونه‌ته‌وه و جووڵه‌یان نه‌كردووه".
هاوكات ره‌شاد گه‌ڵاڵی، لێپرسراوی كۆمیته‌ی مه‌خموری یه‌كێتی نیشتمانی كوردستان به وێستگه نیوزی راگه‌یاند: دۆخی مه‌خمور ئارامه‌و هیچ شتێك له ئارادا نییه.
ئەوەش لەکاتێکدایە هێزە عیراقییەکان لە ئۆپراسیۆنێکدا تا ئێوارەی رۆژی 16ی تشرینی یەکەم، ناحیەی تازە، دووزخومارتوو، داقوق، قەرەتەپە، بنکەی سەربازیی کەیوان، فڕۆکەخانەی کەرکوک، کۆمپانیای غازی باکوور و چەند شوێنێکی تری شاری کەرکوکیان کۆنتڕۆڵکرد.
لە شەڕەکانی ئەو رۆژەدا به‌پێی دوایین ئامار هێزه‌كانی پێشمه‌رگه 86 شه‌هید و 162 بریندار و 37 ونبوو و دیلی هه‌یه.
هەروەها هێزە عیراقییەکان لە بەردەوامیی پێشڕەوییەکانیاندا و لە دوای کشانەوەی هێزەکانی پێشمەرگە رۆژی 17ی تشرینی یەکەمی 2017 بەبێ شەڕ چوونە خانەقین، جەلەولا، مەخمور، دوبز، کێڵگە نەوتییەکانی هاڤانا و بای حەسەن، گوێر، باشیک، شەنگال، بەنداوی موسڵ و مه‌خمور.
هاوكات به‌پێی رێككه‌وتنی نێوان هێزه كوردییه‌كان و حه‌شدی شه‌عبی، له شه‌وی رابردووه‌وه حه‌شدی شه‌عبی له چه‌ند شوێنێكی كه‌ركوك و خانه‌قین و جه‌باره كشاوه‌ته‌وه، به‌ڵام تا ئێستا له سنووری ده‌شتی نه‌ینه‌وا نه‌كشاوه‌ته‌وه.
AM:10:03:19/10/2017