ئەنجوومەنی باڵای ریفراندۆم: ریفراندۆم له‌كاتی خۆیدا ئه‌نجام ده‌درێت

له‌ راگه‌یه‌ندراوێكدا كه‌ وێنه‌یه‌كی بۆ وێستگه‌ نیوز نێردراوه‌، تیایدا هاتووه‌: "لە ژمارەیەك میدیا و دەزگای راگەیاندن، لەسەر بنەمای نووسینێكی بەڕێز بافڵ، تاڵەبانی دەنگۆی ئەوە بڵاو كراوەتەوە كە گوایە پارتی و یەكێتی پاكێجی رێكخراوی نەتەوە یەكگرتووەكان و ئەمریكا و فەڕەنسا و بەریتانیایان پەسەند كردووە و ریفراندۆم ئەنجام نادرێت".

ئه‌نجومه‌نی باڵای ریفراندۆم ده‌شڵێت: "بە گشت لایەك رادەگەیه‌نین كە ئەم هەواڵە هیچ ئەساسێكی نییە و دوورە لە راستی و ریفراندۆم لە كاتی دیاریكراوی خۆی ئەنجام دەدرێت".

بافڵ تاڵه‌بانی، كوڕی گه‌وره‌ی مام جه‌لال سكرتێری گشتی یه‌كێتی نیشتمانی كوردستان له‌ لاپه‌ڕه‌ی تایبه‌تی خۆی له‌ تۆڕی كۆمه‌ڵایه‌تی فه‌یسبوك بڵاویكردووه‌ته‌وه‌: "پاش لەبەرچاوگرتنی ئەو هەموو رێنمایی‌ و پرۆژەو ئامۆژگارییە دڵسۆزانەی كەلە دۆست‌ و پشتیوانەكانمانەوە پێمان گەیشتوون، گەشتینە ئەو باوەڕەی كە باشترین رێگاو بەدیل بۆ چارەسەری ئەم بارودۆخەو گەیشتن بە ئامانجە بەرزەكانی خەباتمان، پاكێجی نەتەوەیەكگرتووەكان‌ و ئەمریكاو فەرەنساو بەریتانیایە كە پێشكەشیان كردووین‌ و بە باشترین چارەسەری دەزانین لە ئێستادا". 

ده‌قی راگه‌یه‌ندراوه‌كه‌ی ئه‌نجومه‌نی باڵای ریفراندۆم:

لە ژمارەیەك میدیا و دەزگەی ڕاگەیاندن، لەسەر بنەمای نووسینێكی بەڕێز پاڤێڵ تاڵەبانی دەنگۆی ئەوە بڵاو كراوەتەوە كە گوایە پارتی و یەكێتی پاكێجی ڕێكخراوی نەتەوە یەكگرتووەكان و ئەمەریكا و فەڕەنسا و بەریتانیایان پەسەند كردووە و ڕیفراندۆم ئەنجام نادرێت.

بە گشت لایەك ڕادەگەیێنین كە ئەم هەواڵە هیچ ئەساسێكی نییە و دوورە لە ڕاستی و ڕیفراندۆم لە كاتی دیاریكراوی خۆی ئەنجام دەدرێت.

ئەنجوومەنی باڵای ریفراندۆم