كۆمسیۆن بڕیاری خۆی لەسەر ریفراندۆم و هەڵبژاردندا
وێستگە نیوز-
کۆمسیۆن لەسەر ڕیفراندۆم و هەڵبژاردنەکان وەڵامی بارزانی دایەوە و ڕایگەیاند، ڕۆژی 25 ئەیلول ڕیفراندۆم و ڕۆژی 1ی تشرینی دووەم هەڵبژاردنەکانی سەرۆکایەتی هەرێم و پەرلەمان ئەنجام دەدەن.
سەیاح کورەچی ئەندامی ئەنجوومەنی کۆمسیاران بە دیجیتاڵ میدیای ئێن ئاڕ تی وتووه، ئەمڕۆ وەڵامی مەرسومەکەی سەرۆکایەتی هەرێم دەدەنەوە و ڕۆژی 25 ئەیلول ڕیفراندۆم و ڕۆژی 1ی تشرینی دووەم هەڵبژاردنەکانی سەرۆکایەتی هەرێم و پەرلەمان ئەنجام دەدرێن.
بارزانی ڕۆژی 8ی حوزەیران مەرسومێکی هەرێمی بۆ ئەنجامدانی هەڵبژاردنی گشتی بۆ خولی پێنجەمی پەرلەمانی کوردستان و سەرۆکایەتی هەرێمی کوردستانی کردووە.
بارزانی داوایکردبوو، کۆمسیۆنی باڵای سەربەخۆی هەڵبژاردن و ڕاپرسی هەرێمی کوردستان ڕۆژێک دەستنیشان بکات بۆ ئەنجامدانی هەڵبژاردن لە ماوەی یاسایی خۆیدا و ئامادەکاریش بۆ ئەو مەبەستە بکرێت.
بارزانی جەختی لەسەر ئەوەش کردووەتەوە کە "گشت دامەزراوە حکومییەکان و حزبییەکان بۆیان نییە بە هیچ شێوەیەک لە شێوەکان دەستێوەردان بکەن لە کاروباری بەرپرسان و سەرپەرشتیاران و ئەنجامدەرانی پرۆسەی هەڵبژاردن و دەنگدان".
هەروەها داواشی لە لایەنە پەیوەندیدارەکان کردووە، پابەندبن بە ئەنجامدانی کاری پێویست و هاوکاری و هەماهەنگی لەگەڵ کۆمسیۆنی باڵای سەربەخۆی هەڵبژاردن و ڕاپرسی بۆ جیبەجێکردنی فەرمانە هەرێمییەکە.
PM:01:48:14/08/2017
ئه‌م بابه‌ته 5599
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت