ئه‌م جۆره‌ دارچینیه‌ هاڕاوه‌ له‌ ماركه‌ی‌"سوپه‌ر براند" ه‌ و به‌رهه‌می كۆمپانیای IHA Beverage Commerce یه‌ ئێستا بۆته‌ یه‌كێك له‌و به‌رهه‌مانه‌ی‌ مه‌ترسی له‌سه‌ر ته‌ندروستی دروست ده‌كات، له‌هه‌ر كیسه‌یه‌ك دارچینی 6.6بۆ  7.7 به‌ش له‌ ملیۆنێك قورقوشمی تیادایه‌، ئه‌وه‌ش 7 جار زیاتره‌ له‌ بڕی ڕێگه‌ پێدراو له‌به‌ر ئه‌وه‌ داوا ده‌كرێت ئه‌م به‌رهه‌مه‌ له‌ ئه‌مه‌ریكا كۆبكرێته‌وه‌ و هه‌تا ئێستاش به‌رهه‌مه‌كه‌ له‌ بازاڕه‌كاندا ماوه‌ و كۆنه‌كراوه‌ته‌وه‌ و داوا له‌ هاوڵاتیان ده‌كرێت دوور بكه‌ونه‌وه‌ له‌ كڕینی.

هه‌ریه‌ك له‌ كۆمه‌ڵه‌ی‌ خۆراك  و ده‌رمانی ئه‌مه‌ریكی و سه‌نته‌ری كۆنترۆڵكردنی نه‌خۆشییه‌كان و خۆپاراستن لێی ئاگایی ده‌ده‌نه‌ هاوڵاتیان دوور بكه‌ونه‌وه‌ له‌ كڕینی ئه‌و به‌رهه‌مانه‌ی‌ قورقوشمی تیادایه‌ به‌تایبه‌ت ئاستی قورقوشم تیایدا زۆره‌ و سه‌لامه‌ت نییه‌، چونكه‌ ئه‌م مادده‌یه‌ كاتێك له‌ڕێی خواردنه‌وه‌ ده‌چێته‌ ناو جه‌سته‌وه‌ له‌ناو سوڕی خوێندا بڵاوده‌بێته‌وه‌ و ده‌چێته‌ ناو شانه‌كانی جگه‌ر و گورچیله‌ و سییه‌كان به‌هۆیه‌وه‌ ئه‌ندامه‌كانی جه‌سته‌ زیانیان به‌رده‌كه‌وێت.

كۆبوونه‌وه‌ی‌ بڕێكی زۆر قورقوشم له‌ جه‌سته‌ی‌ منداڵان هۆكاره‌ بۆ ئه‌سته‌م فێربونیان، هاوكات ئاژانسی نێوده‌وڵه‌تی تایبه‌ت به‌ توێژینه‌وه‌ی‌ شێرپه‌نجه‌ (IARC) ئاگای داوه‌ له‌وه‌ی‌ قورقوشم هۆكاری توشبوونه‌ به‌ شێرپه‌نجه‌ باشتر وایه‌ هاوڵاتیان خۆیان بپارێزن.