مادده‌ی‌ PFAS كۆمه‌ڵێك مادده‌ی‌ كیمیاویه‌ له‌میانی كرداری به‌رهه‌مهێنان و دروستكردنی به‌رهه‌مه‌كان دروست ده‌بێت و له‌ڕێی ئاوی خواردنه‌وه‌ ده‌گوازرێته‌وه‌، هۆكاری توشبوونه‌ به‌ چه‌ندین نه‌خۆشی و له‌ناویاندا شێرپه‌نجه‌ و به‌رز بوونه‌وه‌ی‌ ئه‌نزیمه‌كانی جگه‌ر و دابه‌زینی كێش له‌كاتی منداڵبوون و نه‌خۆشییه‌كانی دڵ و به‌رز بوونه‌وه‌ی‌ كۆلیسترۆڵی خوێن، ئه‌مه‌ بێجگه‌ له‌ زیانه‌كانی بۆ به‌رگری له‌ش.

بۆ دیاریكردنی ئاستی بڵاوبوونه‌وه‌ی‌ PFAS توێژه‌ره‌وه‌كان له‌ زانكۆی"نیو ساوس ویلز" (UNSW)  له‌ سیدنی شیكردنه‌وه‌یان بۆ كۆمه‌ڵێك داتای 273  توێژینه‌وه‌ كردوه‌ و مێژووی توێژینه‌وه‌كه‌ بۆ ساڵی 2004 ده‌گه‌ڕێته‌وه‌.

توێژینه‌وه‌كه‌ له‌سه‌ر زیاتر له‌ 12000 سامپڵی ئاوی سه‌ر زه‌وی وه‌رگیراوه‌ و زیاتر له‌ 33900 سامپڵی ئاوی بیر وه‌رگیراوه‌، دینیس ئۆكارۆل مامۆستا له‌ كۆلێجی ئه‌ندازیاری له‌ زانكۆی نیو ساوس ویلز وتویه‌تی"له‌ هه‌موو شوێنێك توێژینه‌وه‌مان بۆ زانینی ئاست و ڕێژه‌ی‌ مادده‌ی‌ PFAS  كردوه‌، له‌ناویاندا له‌ناو گۆڤاره‌ زانستیه‌كان و ڕاپۆرته‌كانی حكومه‌ت و پێگه‌ ئه‌لیكترۆنیه‌كان"

دكتۆر مارك فیشه‌ر به‌ڕێوبه‌ری پزیشكی هه‌رێمی له‌ كۆمپانیایه‌كی تایبه‌ت به‌ كه‌مكردنه‌وه‌ی‌ مه‌ترسی و زیانی مادده‌ كیمیاویه‌كان كه‌ سه‌نته‌ره‌كه‌ی‌ له‌ له‌نده‌نه‌ وتویه‌تی" زۆرینه‌ی‌ هاوڵاتیان ئه‌مه‌ریكی ئه‌م مادده‌ كیمیاویه‌ له‌ خوێنیاندا هه‌یه‌، ئه‌گه‌رچی ئێستا كه‌متر به‌كارده‌هێندرێت به‌ڵام هێشتا له‌ناو مادده‌ی‌ خۆراكی و ئاو و ناو خاك و ژینگه‌دا هه‌یه‌، له‌ڕێی خواردن و خواردنه‌وه‌ ده‌چێته‌ جه‌سته‌ی‌ مرۆڤه‌وه‌.