‌نیشانه‌ و چاره‌سه‌ری به‌كتریای گه‌ده‌

وێستگە ستایل-


هێلیکۆبەکتێر پایلۆری یان (H. Pylori) یەکێکە لە باوترین ئەو بەکتریایانەی کە دەبنە هۆی هەوکردنی گەدە و برینی گەدە و هەندێک جار شێرپەنجەی گەدە، دكتۆر هێژا پزیشكی نه‌شته‌رگه‌ری هه‌رس و جگه‌ر له‌م بابه‌ته‌دا زانیاری زیاتر له‌سه‌ر ئه‌م به‌كتریایه‌ ده‌خاته‌ ڕوو.

ئەم بەکتریایە شێوەیەکی لولپێچی هەیە و توێژینەوەکان دەریانخستوە کە لە زیاتر لە نیوەی خەڵک لە جیهاندا هەیە، وە یەکێکە لەو نەخۆشیانەی کە ئەگەری توشبونەوەی زۆرە دوای چارەسەر. 

نیشانەکان:
-ئازاری سک (وە بەئازارتر دەبێت کاتێک گەدە خاڵیە( 
-دڵتێکەڵهاتن و ڕشانەوە 
-نەمانی ئارەزوی خواردن 
-قرقێنەی زۆر 
-کێش دابەزین 
-ئەگەر ئەم هەوکردنە چارەسەر نەکرێت ئەوا دەبێتە هۆی لەناوبردنی خانەکانی گەدە و بونی برین و دروستبونی زیادەگۆشت لە گەدەدا و چەندین نەخۆشی درێژخایەنی دیکە کە چارەسەرەکەیان قورس تر دەبێت. 

دەستنیشانکردن:
پشکنینی پیسای یان پشکنینی خوێن بەس نیە بۆ دەستنیشانکردنی ئەم هەوکردنە. شێوەی دروستی دەستنیشانکردن بە هەناوبینی دەکرێت و بەشێک لە شانەی ناو گەدە وەردەگیرێت بۆ پشکنینی و زانینی هۆکاری هەوکردنەکە.
 
چارەسەر:
چەندین ڕێژیمی جیای دژەزیندەی بەکاردێت کە لە ٣ حەب پێکدێن و لەلایەن پزیشکی پسپۆڕەوە ماوەی بەکارهێنانی دیاریدەکرێت.

هەرکاتێک هەستت بە نیشانانەکان کرد، ئەوا سەردانی پزیشکی پسپۆڕ بکە و بەزوترین کات چارەسەر وەربگرە.



AM:10:08:21/06/2021


ئه‌م بابه‌ته 648 جار خوێنراوه‌ته‌وه‌‌