جێڵ پۆڵیشی نینۆک قەدەغەکرا
وێستگە ستایل-
دەزگای مەغریبی بۆ دەرمان و بەرهەمە تەندروستییەکان لە نوێترین هەنگاویدا بڕیاریدا بە قەدەغەکردنی بەرهەمهێنان، هاوردەکردن، فرۆشتن و بەکارهێنانی ئەو بەرهەمە جوانکاریانەی کە ماددەی کیمیایی trimethyl benzoylphosphine diphenyl oxide کە ناسراوە بە "TPO" یان تێدایە.
ئەم بڕیارەی دەزگاکە لەسەر بنەمای لێکۆڵینەوە زانستییەکان و ستانداردە جیهانییەکان دێت لەسەر ماددەی TPO، ئەم ماددەیە بە پلەی یەکەم لە جۆرە جیاوازەکانی بۆیەی نینۆک و جێڵ پۆڵیشی نینۆکدا بەکاردێت و دەرکەوتووە کە پێکهاتەیەکی زیانبەخش و ژەهراوی هەیە.
مەغریب وەک یەکەم وڵات دەستپێشخەری کرد لە قەدەغەکردنی ئەم پێکهاتە ژەهراوییە و هەر زوو هەموو پسپۆڕانی تەندروستی، بەکارهێنەران و ئەو کەسانەی کە لە بواری جوانکاری نینۆکدا کاردەکەن ئاگادارکرانەوە کە چیدیکە ئەو ماددەیە بەردەست نابێت و بە هیچ جۆرێک بازرگانی پێوە ناکرێت.
جێگەی ئاماژەیە بەرکەوتنی بەردەوامی نینۆکەکان بەم ماددەیە دەبێتە هۆی زیانگەیاندنێکی درێژخایەن و چەندین کێشەی تەندروستی لێدەکەوێتەوە، هەربۆیە دوورکەوتنەوە لە جێڵ پۆلیشی نینۆکەکان هەنگاوێکی سادەی پاراستنی تەندروستییە.
AM:11:31:01/09/2025
ئه‌م بابه‌ته 560
جار خوێنراوه‌ته‌وه