مەترسییەکانی شەکرەی دووگیانی کامانەن ؟
وێستگە ستایل-
نەخۆشی شەکرەی دووگیانی کە ناوە زانستییەکەی (GDM)ە دەبێتە هۆی بەرزبوونەوەی ڕێژەی شەکری خوێن لە ماوەی دووگیانیدا و لە پاش منداڵبوون نامێنێت، ئەم حاڵەتە بۆی هەیە لە هەر کاتێکی ماوەی دووگیانیدا بەدەربکەوێت بەڵام ئەگەری دووچاربوون لە سێ مانگی دووهەم و سێهەمدا زیاترە، ئەم نەخۆشییە مەترسی تەندروستی بۆ هەردوو ئافرەتی دووگیان و کۆرپەکە دروست دەکات ئەگەر بە باشی چارەسەرنەکرێت.
- مەترسییەکان بۆ دایک بریتین لە :
1- بەرزی پەستانی خوێن: شەکرەی دووگیانی مەترسی تووشبوون بە بەرزی پەستانی خوێن زیاد دەکات، کە حاڵەتێکی جددییە و دەتوانێت کاریگەری لەسەر چەندین ئەندام هەبێت و هەم دایک و کۆرپە بخاتە مەترسییەوە.
2- منداڵبوون بە نەشتەرگەری (C-section): کۆرپەلەی گەورە کە بەهۆی بەرزی پەستانی خوێنەوە ڕوودەدات لەوانەیە ببێتە هۆی ئاڵۆزییەکان لە کاتی منداڵبوونی سروشتی ، ئەمەش ئەگەری منداڵبوون بە نەشتەرگەری زیاد دەکات.
3- مەترسی تووشبوون بە شەکرە لە داهاتوودا: ئەو خانمانەی کە شەکرەی دووگیانیان هەیە ئەگەری تووشبوونیان بە جۆری دووەمی شەکرە لە ماوەی 10-20 ساڵدا 35-70% ە.
4- شلەی زیادەی ئامنۆتیک: دەتوانێت ببێتە هۆی منداڵبوونی پێشوەختە یان ئاڵۆزییەکان لە کاتی منداڵبووندا.
5- منداڵبوونی پێشوەختە.
- مەترسییەکانی بۆ سەر کۆرپە بریتین لە :
1- ماکرۆسۆمیا واتە منداڵی گەورە کە کێشی لەشی زیاتربێت لە 4 کیلۆ، دەتوانێت ببێتە هۆی برینداربوون لە کاتی لەدایکبوون وەکو زیانگەیاندن بە شانی کۆرپەلە.
2- دابەزینی شەکری خوێن دوای لەدایک بوون: ئەو کۆرپانەی کە لە دایکانی تووشبوو بە شەکرەی دووگیانی لەدایک دەبن لەوانەیە ئەنسۆلینی زیادە بەرهەم بهێنن، ئەمەش دەبێتە هۆی دابەزینی شەکری خوێن دوای منداڵبوون.
3- نیشانەکانی ناڕەحەتی هەناسەدان (RDS) بەتایبەت ئەگەر منداڵەکە زوو لەدایک بوو؛ بەرزبوونەوەی شەکری خوێن دەتوانێت گەشەکردنی سییەکان دوابخات.
4- زیادبوونی ئەگەری قەڵەوی و نەخۆشی شەکرەی جۆری دووەم لە تەمەنی دواتردا.
PM:05:12:30/08/2025
ئه‌م بابه‌ته 544
جار خوێنراوه‌ته‌وه