نوێترین توێژینەوە کە لە ڕۆژنامەی "American Heart Association" بڵاوکراوەتەوە ئاماژە بەوە دەدات ئەو منداڵانەی تەمەنیان 10 ساڵ، هەروەها ئەو پێگەیشتوانەی کە تەمەنیان گەیشتۆتە 18 ساڵ و کاتێکی زۆر لە بەردەم شاشەی ئامێرە زیرەکەکانی وەک مۆبایل، تەلەفیزیۆن، کۆمپیوتەر و یارییە ئەلکترۆنییەکاندا بەسەردەبەن لە ئەگەرێکی چاوەڕوانکراوی دووچاربووندان بە نەخۆشییەکانی دڵ، بەرزە فشاری خوێن، بەرزی کۆلسترۆڵ و نەخۆشی شەکرە بە هۆی ڕێگریکردن لە کاری ئەنسۆلین.

ئەم توێژینەوەیە بە بەشداریکردنی نزیکەی 1000 کەس بەڕێوەچووە لە دانیمارک، پسپۆڕان ئاشکرایانکردووە زیادکردنی هەر کاتژمێرێک لە بەکارهێنانی شاشە زیرەکەکان لە لایەن منداڵانەوە مەترسی دووچاربوونیان بەم نەخۆشییانە زیاتر دەکات.

هەمان توێژینەوە ئاماژە بەوە دەدات کە منداڵانی تەمەن 10 ساڵ ڕۆژانە 3 کاتژمێر و تازەپێگەیشتوانی تەمەن 18 ساڵیش ڕۆژانە 6 کاتژمێر لە بەردەم شاشە زیرەکەکان بەسەردەبەن و پسپۆڕان ئاگایی دەدەن لە کەمکردنەوەی بەرچاوی ئەم کاتژمێرانە بە مەبەستی پاراستنی تەندروستیان.