تەیلۆر سویفت نوێترین ئەلبوومی خۆی بڵاودەکاتەوە
وێستگە ستایل-
ئەستێرە و گۆرانیبێژی ئەمریکی تەیلۆر سویفت مژدەی بڵاوکردنەوەی دوانزەهەمین ئەلبوومی خۆی بە ناوی "The Life of a Showgirl" بە هەوادارەکانی خۆی دا لە سەرتاسەری جیهاندا.
ئەو ئەستێرەیە هەمیشە بەوە دەناسرێت کە بەر لە بڵاوکردنەوەی هەر ئەلبومێکی نوێی بە چەند پەیامێکی نهێنی ئامێز هەوادارەکانی ئاگاداردەکاتەوە و تووشی سەرسوڕمانیان دەکات، لە نوێترین بڵاوکراوەی خۆیدا بە دانانی 12 وێنە لە پەڕەی فەرمی خۆی لە تۆڕی کۆمەڵایەتی ئینستاگرام کە لەسەری نووسیوە دەتانبینم هەوادارەکانی سەرسام کردووە.
ئەمە لە کاتێکدایە باڵەخانەی "The Empire State" لە نیۆرک بە ڕەنگی پڕتەقاڵی ڕووناککراوەتەوە وەک ئاماژەیەک بۆ ڕەنگی نوێترین ئەلبومی ئەو ئەستێرەیە، وێنەی باڵەخانەکە لە پەڕەی فەرمی خۆیان لە تۆڕی کۆمەڵایەتی ئینستاگرام دانراوە بە نووسینی هەمان وتەی سویفت "Into the next era".
ئەلبوومە نوێیەکەی گۆرانیبێژە ئەمریکییەکە یەکەم ئەلبوومی ئەو ئەستێرەیە دەبێت کە بە تەواوی خۆی خاوەنداری دەکات لە پاش تێپەڕینی 6 ساڵ بەسەر کێشەکانی لەگەڵ کۆمپانیای تۆمارکردنەکانی پێشووتری ئەو گۆرانیبێژە.
تەیلۆر سویفت گۆرانیبێژێکی بەناوبانگی جیهانییە، لە بەرواری 13 ی کانوونی یەکەمی ساڵی 1989 لە ویلایەتی پەنسلڤانیای ئەمریکا لەدایکبووە و تاوەکو ئێستا خاوەنی 11 ئەلبوومی گۆرانییە و یەکێکە لە بەناوبانگترین ئەستێرەکانی بوای گۆرانی ئەو وڵاتە.
PM:12:09:13/08/2025
ئه‌م بابه‌ته 704
جار خوێنراوه‌ته‌وه