2 ی ئەم مانگە هەریەکە لە بروکلین بێکهام کوڕە گەورەکەی ئەستێرەی پێشووتری تۆپی پێی بەریتانیا دەیڤد بێکهام و نیکۆلا پێلتزی هاوسەری کە بۆ یەکەم جار لە ساڵی 2022 دا هاوسەرگیریان کردبوو، بۆ جاری دووهەم گرێبەستی هاوسەرگیرییەکەیان نوێکردەوە لە ناوچەی وێستچستەری ویلایەتی نیۆرک و تەنها بە ئامادەبوونی خێزانی نیکۆلا.

نیکۆلا بە پۆشینی کراسی بووکێنی دایکە تەمەن 70 ساڵاکەی و بە یارمەتی گەورەی نێلسنی باوکی کە تەمەنی 83 ساڵە توانی ئەم مەراسیمە بەڕێوەببات و ببێتە جێگەی سەرسوڕمانی هەموو لایەک، جێگەی ئاماژەیە هیچ کام لە دەیڤد بێکهام، ڤیکتۆریا بێکهام، ڕۆمیۆ، کروز و هارپەری خێزانی بروکلین لەم مەراسیمەدا ئامادەنەبوون و تەنانەت ئەوان ئاشکرایانکردووە کە لە ڕێگەی یەکێک لە وێبسایتە ئەمریکییەکانەوە زانیویانە کوڕە گەورەی خێزانەکە بە چییەوە سەرقاڵبووە.

گرژی و ئاڵۆزییەکانی ئەم خێزانە لەگەڵ بروکلینی کوڕە گەورەیان دوا بە دوای تووڕەبونی دێت لە یادی 50 ساڵەی لەدایکبوونی دەیڤد بێکهامی باوکیدا، ئەمە جگە لەوەی خێزانەکەی بێکهام لە خێزانەکەی نیکۆلای هاوسەری کوڕە گەورەکەیان تووڕەبوون پاش ئەوەی وا دەرکەوتبوو دەستیان بەسەر تەواوی ئاهەنگی هاوسەرگیری بروکلین گرتبێت لە ساڵی 2022، دوا بە دوای ئەو ڕووداوەش هەرگیز جارێکی دیکە ئەو دوو خێزانە کۆنەبوونەتەوە و نیکۆلا وێنەی نییە لەگەڵ خێزانی هاوسەرەکەیدا.

یەکەم ئاهەنگی هاوسەرگیری بروکلین و نیکۆلا لە ساڵی 2022 بڕی 3 ملیۆن پاوەنی بەریتانی تێچووە و ڕۆژی دووشەممە وێنەی ئاهەنگە نوێیەکەیان لە پەڕەی فەرمی خۆیان لە تۆڕی کۆمەڵایەتی ئینستاگرام بڵاوکردەوە وەک پەیامێک بۆ مانەوەی هاوسەرگیرییەکەیان.