زیرەکی دەستکرد دەچێتە ناو چێشتخانەکانەوە؛ ئایا ڕۆبۆتەکان جێگەی شێفە لێهاتووەکان و دەستڕەنگینی مرۆڤ دەگرنەوە؟

وێستگە ستایل - سۆلین عوسمان

تەکنەلۆژیا بە هەموو سێکتەرەکانی ژیاندا بڵاوبووەتەوە و بەردەوامە لە سەرسامکردنی مرۆڤایەتی، ئەمجارە ئەم پێشکەوتنانە گەیشتووەتە ناو جەرگەی چێشتخانە گەورە و بەناوبانگەکانی جیهان، بە ئامانجی داهێنانی تامی نوێ و ڕێکخستنی کاتەکان بە وردییەکی بێ وێنە.

چەندین چێشتخانەی نێودەوڵەتی و ڕێستۆرانتە خاوەن ئەستێرەکانی میشێلن لە پاریس، لەندەن و نیویۆرک، دەستیان کردووە بە تاقیکردنەوە و بەکارهێنانی سیستەمی زیرەکی دەستکرد بۆ دانانی لیستی خواردنەکان (مێنیۆ) و دۆزینەوەی ئەو پێکهاتانەی کە لە ڕووی کیمیاییەوە پێکەوە دەگونجێن.

ئەم تەکنەلۆژیا نوێیە دەتوانێت لە چەند چرکەیەکدا هەزاران پێکهاتە و جۆری بەهارات شی بکاتەوە و تامی نوێ بدۆزێتەوە کە ڕەنگە مێشکی مرۆڤ بۆ ساڵانێکی زۆر بیری لێ نەکردبێتەوە. هاوکات، ئێستا ڕۆبۆتی تایبەت دروستکراون کە دەتوانن بە وردییەکی یەکجار زۆر گۆشت و سەوزەوات ببرن یان پلەی گەرمی فڕن و مەنجەڵەکان بە جۆرێک کۆنتڕۆڵ بکەن کە هیچ کات خواردنەکە تێک نەچێت و هەمان تامی ستاندارد بپارێزێت.

پیشەسازی چێشتلێنان هەمیشە لە گۆڕاندایە و لە مێژوودا لە ئاگرەوە گۆڕاوە بۆ کارەبا و گاز، بەڵام ئەمەی ئێستا ڕوودەدات شۆڕشێکی گەورەیە کە نەک تەنها لە ڕێستۆرانتەکان، بەڵکو لە داهاتوودا دەچێتە ناو چێشتخانەی ماڵەکانیشەوە و ئامێرەکان دەبنە یاریدەدەرێکی کارای ژنان و پیاوان لە کاتی ئامادەکردنی ژەمەکاندا.

هەرچەندە تەکنەلۆژیا کارەکان ئاسان دەکات و وردی زیاد دەکات، بەڵام زۆربەی ڕەخنەگرانی بواری خواردن پێیان وایە کە "هەستی مرۆڤ" و ئەو خۆشەویستییەی شێفێک لە کاتی کارکردندا هەیەتی، هۆکاری سەرەکی خۆشی خواردنە و هیچ ئامێر و کۆدێکی کۆمپیوتەری ناتوانێت جێگەی ئەو "دەستڕەنگینییە" بگرێتەوە.

گۆڤاری فۆد تێک و ئاژانسی هەواڵی ڕۆیتەرز