پەتاتە سوودی لەوە زیاترە کە بیری لێ دەکەیتەوە؛ بۆ دڵ و هەرسکردن وەک جادوویە
وێستگە ستایل - سۆلین عوسمان
پەتاتە کە زۆر جار وەک خۆراکێکی سادە و تەنها بۆ تێربوون تەماشا دەکرێت، لە ڕاستیدا
گەنجینەیەکی پڕە لە ماددە خۆراکییەکان، ئەگەر بە شێوازێکی تەندروست ئامادە بکرێت
دەتوانێت ببێتە پارێزەرێکی بەهێزی تەندروستی دڵ و کۆئەندامی هەرس و پارێزگاری لە
کێشی جەستەش بکات.
سەرەڕای ئەوەی زۆرێک لەو کەسانەی دەیانەوێت کێشیان دابەزێنن لە پەتاتە دوور
دەکەونەوە، بەڵام پسپۆڕانی خۆراک دەڵێن پەتاتە خۆی لە خۆیدا قەڵەوکەر نییە،
بەڵکو شێوازی سوورکردنەوەی لەناو ڕۆن و زیادکردنی کەرە و پەنیرە کە دەیگۆڕێت بۆ
ژەمێکی پڕ لە کالۆری، ئەگەرنا پەتاتەی کوڵاو یان برژاو یەکێکە لە باشترین
سەرچاوەکانی وزە.
پەتاتە سەرچاوەیەکی دەوڵەمەندی پۆتاسیۆمە، کە ئەم کانزایە ڕۆڵێکی سەرەکی دەگێڕێت لە
نزمکردنەوەی فشاری خوێن و پاراستنی دڵ لە جەڵتە، هەروەها بڕێکی زۆر لە ڕیشاڵە
خۆراکییەکانی تێدایە کە یارمەتی پاککردنەوەی ڕێخۆڵەکان دەدەن و پرۆسەی
هەرسکردن چالاک دەکەن، بوونی ڤیتامین B6 تێیدا وای لێدەکات یارمەتیدەر بێت
بۆ بەرهەمهێنانی هۆرمۆنەکانی دڵخۆشی و کەمکردنەوەی دڵەڕاوکێ و پاراستنی خانەکانی
مێشک.
ئەم ڕووەکە ڕەگییە کە بۆ یەکەمجار لە ئەمریکای باشوور دۆزرایەوە، لە مێژوودا چەندین
جار مرۆڤایەتی لە برسێتی ڕزگار کردووە و بەهۆی توانای بەرگەگرتنی بۆ ماوەیەکی درێژ
و بوونی کاربۆهیدراتی پێویست تێیدا، هەمیشە وەک خۆراکی یەکەم بۆ مرۆڤ ماوەتەوە.
لە کۆتاییدا بۆ بەدەستهێنانی باشترین ئەنجام، پێشنیار دەکرێت پەتاتە بە
توێکڵەکەیەوە بکوڵێنرێت یان ببرژێنرێت چونکە زۆربەی ڤیتامین و
ڕیشاڵەکان لە توێکڵەکەیدا یان ڕێک لە ژێر توێکڵەکەیدا کۆبوونەتەوە، بەمەش
دەبێتە ژەمێکی تەندروست و پڕ لە سوود بۆ هەموو تەمەنەکان.
سەرچاوە: ماڵپەڕی جیهانی WebMD
PM:11:25:02/05/2026