هەوڵەکان بۆ گەڕاندنەوەی بیستن بۆ منداڵانی نابیست دەگەنە قۆناغی کۆتایی

وێستگە ستایل - سۆلین عوسمان

چارەسەرێکی جینی نوێ و شۆڕشگێڕانە بۆ چارەسەرکردنی نابیستی زگماکی لە منداڵاندا نزیکە لە وەرگرتنی ڕەزامەندی FDA، ئەمەش هیوایەکی گەورە دەبەخشێت بەو خێزانانەی کە منداڵەکانیان بەهۆی کێشەی جینییەوە ناتوانن ببیستن. ئەم چارەسەرە کە بە (DB-OTO) ناسراوە، جێگرەوەیەکی بایۆلۆژی دەبێت بۆ ئامێرە ئەلیکترۆنییەکانی بیستن و چاندنی گوێچکە.

نەخۆشییەکە پەیوەستە بە بازدانی جینی (Otoferlin) کە بەرپرسە لە گواستنەوەی ئاماژە دەنگییەکان لە گوێچکەی ناوەڕاستەوە بۆ مێشک. کاتێک ئەم جینە تێکدەچێت، منداڵەکە بە نابیستییەکی تەواوەوە لەدایک دەبێت. چارەسەرە نوێیەکە کاردەکات لەسەر گەیاندنی کۆپییەکی تەندروستی جینەکە بۆ ناو خانەکانی گوێچکە، ئەمەش وایان لێدەکاتەوە دەست بکەنەوە بە کارکردنی سروشتی خۆیان.

ئەنجامەکانی تاقیکردنەوەی کلینیکی لەسەر ١٢ منداڵ زۆر سەر سوڕهێنەر بوون، زۆربەی ئەو منداڵانەی چارەسەرەکەیان وەرگرتووە، بیستنیان بۆ گەڕاوەتەوە بۆ ئاستێکی نزیک لە سروشتی. ئەمە بۆ یەکەمجارە لە مێژوودا کە چارەسەرێکی دەرمانسازی بتوانێت بیستن بۆ منداڵێکی نابیست بگەڕێنێتەوە بەبێ پێویستی بە نەشتەرکارییە ئاڵۆزەکان یان ئامێرە دەرەکییەکان.

ئەم چارەسەرە جینییە تەنها بۆ نابیستی گرنگ نییە، بەڵکو دەبێتە دەروازەیەک بۆ چارەسەرکردنی زۆرێک لە کێشەکانی تری هەستەوەرەکان لە ڕێگەی دەستکاریکردنی جینەکانەوە. ئەگەر FDA ڕەزامەندی لەسەر بدات، دەبێتە یەکەم دەرمانی لەو شێوەیە لە جیهاندا کە ڕەگ و ڕیشەی کێشەکە چارەسەر دەکات نەک تەنها نیشانەکان

چاوەڕوانییەکان بۆ پەسەندکردنی ئەم دەرمانە زۆر بەرزن، چونکە نەک تەنها کێشەیەکی تەندروستی چارەسەر دەکات، بەڵکو کاریگەرییەکی کۆمەڵایەتی قووڵیشی دەبێت لەسەر تێکەڵبوونی ئەو منداڵانە بە کۆمەڵگە. زانایان پێیان وایە ئەمە سەرەتای سەردەمێکی نوێیە کە تێیدا کەمئەندامییە زگماکییەکان دەبنە شتێکی ڕابردوو

.

سەرچاوە: ساینس دەیڵی