چارەسەری بەرگری پێش نەشتەرگەری ئەنجامی سەرسوڕهێنەر لە چارەسەرکردنی شێرپەنجەی پێست بەدەستدەهێنێت

وێستگە ستایل - سۆلین عوسمان

ئەنجامەکانی تاقیکردنەوەیەکی کلینیکی نوێ کە لەلایەن توێژەرانی زانکۆی کالیفۆرنیا (UCLA) سەرپەرشتی کراوە، دەریخستووە کە بەکارهێنانی چارەسەری بەرگری (Immunotherapy) پێش ئەنجامدانی نەشتەرگەری بۆ جۆرێکی دەگمەن و شەڕەنگێزی شێرپەنجەی پێست، دەتوانێت گرێیەکان بچووک بکاتەوە یان بە تەواوی لەناویانبەرێت.

ئەم جۆرە شێرپەنجەیە کە بە (Desmoplastic Melanoma) ناسراوە، زۆر بە زەحمەت چارەسەر دەکرێت و زۆربەی کات پێویستی بە نەشتەرگەرییەکی گەورە و قورس هەیە. بەڵام شێوازی نوێ کە پێی دەوترێت "نێوئادجۆڤانت"، بریتییە لە پێدانی دەرمانی بەرگری بە نەخۆشەکە پێش نەشتەرگەری بۆ ئەوەی سیستەمی بەرگری جەستە هان بدات هێرش بکاتە سەر خانە شێرپەنجەییەکان. ئەنجامەکان ئەوەندە باش بوون کە لە هەندێک حاڵەتدا لە کاتی نەشتەرگەریدا هیچ خانەیەکی شێرپەنجەیی لە جەستەی نەخۆشەکەدا نەماوە.

ئەم دۆزینەوەیە مژدەیەکی گەورەیە بۆ نەخۆشەکان، چونکە کاتێک گرێیەکە پێشوەختە بچووک دەکرێتەوە، پزیشکەکان دەتوانن نەشتەرگەرییەکی سادەتر بکەن. ئەمەش واتە کەمبوونەوەی مەترسی شێواندنی دەموچاو یان جەستە و پاراستنی کوالیتی ژیانی نەخۆشەکە دوای چاکبوونەوە. ئەم ڕێگەیە نەک تەنها چانسی مانەوە لە ژیان زیاد دەکات، بەڵکو ئازار و کاریگەرییە لاوەکییەکانی نەشتەرگەریش کەمدەکاتەوە

توێژینەوەکە پاڵپشتی لەو بیرۆکەیە دەکات کە دەبێت چارەسەری بەرگری لە قۆناغە سەرەتاییەکانی شێرپەنجەدا بەکاربهێنرێت، نەک تەنها کاتێک کە هەموو چارەسەرەکانی تر شکستیان هێناوە. ئەم سەرکەوتنە دەتوانێت ڕێگا خۆشبکات بۆ بەکارهێنانی هەمان شێواز بۆ جۆرەکانی تری شێرپەنجە و گۆڕانکاری بنەڕەتی لە جیهانی پزیشکیدا دروست بکات

UCLA Health / Journal of Clinical Oncology

PM:06:48:24/02/2026

ئه‌م بابه‌ته 76 جار خوێنراوه‌ته‌وه‌‌