ئەنجامی لێکۆڵینەوە نوێیەکان؛ ئایا برنج دەبێتە هۆی 

تێکچوونی تەندروستی مرۆڤ؟

وێستگە ستایل - سۆلین عوسمان

برنج یەکێکە لەو خواردنە سەرەکییانەی کە زۆربەی دانیشتوانی گۆی زەوی ڕۆژانە پشتی پێ دەبەستن، بەڵام توێژینەوە نوێیەکان هۆشداری دەدەن لەوەی خواردنی بڕێکی زۆر لەم دانەوێڵەیە دەبێتە هۆی دروستبوونی کێشەی تەندروستی جددی کە ڕەنگە زۆرێک لێی بێئاگا بن.

پسپۆڕانی بواری خۆراک ئاماژە بەوە دەکەن کە برنجی سپی بەهۆی پرۆسەی پاڵاوتنەوە زۆربەی ڕیشاڵ و ڤیتامینە گرنگەکانی لەدەست دەدات، ئەمەش وای لێدەکات ببێتە سەرچاوەیەکی خێرای کاربۆهیدرات کە ئاستی شەکر لە خوێندا بە خێرایی بەرز دەکاتەوە، ئەم تێپەڕینە خێرایەی گلوکۆز بۆ ناو خوێن مەترسی تووشبوون بە نەخۆشی شەکرەی جۆری دووەم زیاد دەکات.

جگە لە پرسی شەکرە، یەکێکی دیکە لە مەترسییە گەورەکانی برنج بوونی ماددەی "ئارسنیک"ە، برنج لە کاتی گەشەکردنیدا بڕێکی زیاتر لەم ماددە ژەهراوییە لە خاک و ئاوەوە هەڵدەمژێت بەراورد بە دانەوێڵەکانی دیکە، کەڵەکەبوونی ئەم ماددەیە لە جەستەدا لە درێژخایەندا دەبێتە هۆی دروستبوونی کێشە لە کۆئەندامی دەمار و زیادبوونی مەترسییەکانی شێرپەنجە.

لە ڕووی مێژووییەوە، برنج وەک سەرچاوەی سەرەکی وزە سەیر کراوە، بەڵام گۆڕانی شێوازی ژیان و کەمبوونەوەی جوڵەی مرۆڤ وایکردووە ئەو وزە زۆرەی لە برنجەوە دەستدەکەوێت وەک چەوری لە دەوری ورگ کۆببێتەوە، ئەمەش هۆکاری سەرەکییە بۆ قەڵەوی و نەخۆشییەکانی دڵ کە لە کۆمەڵگە ڕۆژهەڵاتییەکاندا بەربڵاون.

لە کۆتاییدا، پزیشکان ئامۆژگاری هاوڵاتییان دەکەن کە بڕی خواردنی برنج کەم بکەنەوە و پەنا ببەنە بەر بەکارهێنانی برنجی قاوەیی یان جێگرەوەکانی تری وەک بڕوێش، چونکە ڕێژەی ڕیشاڵیان بەرزترە و زیانەکانیان کەمترە بۆ سەر کێش و تەندروستی گشتی.

سەرچاوە: ماڵپەڕی تەندروستی هێڵس لاین.

PM:11:23:24/01/2026

ئه‌م بابه‌ته 80 جار خوێنراوه‌ته‌وه‌‌