ناسا دەست بە قۆناغی کارپێکردنی تەلەسکۆپی نوێی "ڕۆمان" دەکات

وێستگە ستایل - سۆلین عوسمان

ئاژانسی ناسا پڕۆسەی کارپێکردنی تەلەسکۆپی بۆشاییگەرانی "نانسی گریس ڕۆمان"ی دەستپێکرد، کە یەکێکە لە پڕۆژە هەرە پڕ بایەخەکانی ئەو ئاژانسە بۆ دۆزینەوەی نهێنییەکانی گەردوون.

ئەم تەلەسکۆپە لە ٣٠ی ئابدا ڕەوانەی بۆشایی ئاسمان کرا و ئێستا بەرەو شوێنی دیاریکراوی خۆی لە خولگەیەکدا گەشت دەکات کە ١.٥ ملیۆن کیلۆمەتر لە زەوییەوە دوورە.

تەلەسکۆپی ڕۆمان بۆ لێکۆڵینەوە لە گەورەترین پرسیارە بێوەڵامەکانی گەردوونناسی دروستکراوە، لەوانە سروشتی وزەی تاریک، ماددەی تاریک و چۆنیەتی دروستبوونی سیستمە هەسارەییەکان.

لە کاتی گەشتەکەیدا، ئەندازیاران خەریکی تاقیکردنەوەی سیستمەکان و کارپێکردنی پانێڵە خۆرییەکانن، هەروەها ئامێرە وردەکانی وەک "کۆرۆناگراف" لە قۆناغی سەرەتایی کارکردندان بۆ ئەوەی دڵنیابن لەوەی ئامادەیە بۆ وێنەگرتنی گەردوون.

زانایان هیوادارن ئەم تەلەسکۆپە یارمەتیدەر بێت لە دۆزینەوەی هەسارەی دوور و تێگەیشتن لە چۆنیەتی فراوانبوونی گەردوون بە درێژایی مێژوو، چونکە توانای بینینی ڕووبەرێکی زۆر فراوانتری هەیە بەراورد بە تەلەسکۆپەکانی تر.

چاوەڕوان دەکرێت یەکەمین وێنە زانستییەکان دوای کۆتایی هاتنی قۆناغی تاقیکردنەوە بڵاوبکرێنەوە و ناسا پلانی هەیە لە ساڵی ٢٠٢٧دا بە فەرمی دەست بە چاودێرییە زانستییە گەورەکانی بکات.

سەرچاوە: سپەیس دۆت کۆم، ئەیلولی ٢٠٢٦

PM:11:18:08/09/2026

ئه‌م بابه‌ته 108 جار خوێنراوه‌ته‌وه‌‌