کۆمپانیای تابی بۆ تەکنەلۆژیای دارایی بەهاکەی دەگاتە ٦.٥ ملیار دۆلار

وێستگە ستایل - سۆلین عوسمان

کۆمپانیای تابی (Tabby) کە لە وڵاتی سعودیە کاردەکات و تایبەتە بە تەکنەلۆژیای دارایی، توانی لە گەڕێکی نوێی وەبەرهێناندا بڕی ٢٣٣ ملیۆن دۆلار کۆبکاتەوە، بەمەش بەهای بازاڕیی خۆی گەیاندە ٦.٥ ملیار دۆلار و پێگەی خۆی لە نێو گەورەترین کۆمپانیاکانی فینتەکی ڕۆژهەڵاتی ناوەڕاستدا بەهێزتر کرد.

ئەم گەڕەی وەبەرهێنان (Series F) لەلایەن بلۆ پووڵ کاپیتال سەرپەرشتی کرا و کۆمپانیاکانی دیکەی وەک وێڵنگتن مانێجمێنت بەشدارییان تێدا کرد، بەپێی ئاژانسی ڕۆیتەرز کۆمپانیاکە پلانی هەیە ئەم سەرمایەیە بۆ فراوانکردنی خزمەتگوزارییەکانی لە سعودیە و ئیمارات بەکاربهێنێت.

تابی لە ساڵی ٢٠١٩ دامەزراوە و پلاتفۆڕمێکی دارایی پێشکەش دەکات کە خزمەتگوزاریی قەرزدان بە کڕیاران و چارەسەری دارایی بۆ بازرگانان لەخۆدەگرێت؛ کۆمپانیاکە خاوەنی

٢٥ ملیۆن بەکارهێنەری تۆمارکراوە و هاوبەشی لەگەڵ ٧٠ هەزار فرۆشگا هەیە.

قەبارەی مامەڵە داراییە ساڵانەکانی تابی لە ١٨ ملیار دۆلار تێپەڕیوە، بەپێی ڕاگەیاندنی فەرمیی کۆمپانیاکە.

ئەم دەستکەوتە نوێیە ئاماژەیە بۆ گەشەسەندنی خێرای دارایی دیجیتاڵی لە وڵاتانی کەنداو، کە تێیدا مۆبایلە زیرەکەکان و کڕینی ئۆنلاین و سیستەمەکانی پێدانی پارە شێوازی پەیوەندیی نێوان کڕیاران و بازرگانانیان گۆڕیوە.

فراوانبوونی تابی نیشانەی ئەوەیە کە کۆمپانیاکانی فینتەک چیتر تەنها لە بواری پارەداندا نین، بەڵکو دەچنە ناو کەرتی بەرفراوانتری پێشکەشکردنی بەرهەمی دارایی بۆ بەکارهێنەران و بزنسە بچووکەکان، و بە سەرمایەی نوێشەوە سەرنج دەخەنە سەر قازانج و پەرەپێدانی هەرێمی.

(ڕۆیتەرز)

PM:10:57:14/09/2026

ئه‌م بابه‌ته 120 جار خوێنراوه‌ته‌وه‌‌