مزگێنی بۆ گەیمەران؛ وادەی Assassin's Creed و فیلمی Call of Duty ئاشکرا کرا

وێستگە ستایل - سۆلین عوسمان

هەفتەیەکی پڕ لە هەواڵی گەورە بۆ جیهانی یارییە ئەلیکترۆنییەکان تێپەڕی، کاتێک وادەی بڵاوبوونەوەی یەکێک لە چاوەڕوانکراوترین بەشەکانی زنجیرەی Assassin's Creed ئاشکرا کرا. کۆمپانیای بەرهەمهێنەر ڕایگەیاند کە بەشە نوێکراوەکەی یاری Assassin's Creed Black Flag بە فەرمی لە ڕێکەوتی 9ی تەمموزی ئەمساڵدا دەکەوێتە بەردەستی گەیمەران، کە ئەمەش یەکێکە لە خۆشەویستترین بەشەکان لەلای جەماوەری ئەم یارییە.

هاوکات لەگەڵ ئەم هەواڵە، پیشەسازی سینەما و گەیمینگ جارێکی دیکە تێکەڵ بوونەوە، کاتێک بە فەرمی ڕێکەوتی نمایشکردنی فیلمی سینەمایی Call of Duty دیاری کرا. بڕیارە ئەم فیلمە کە لەسەر بنەمای یارییە جەنگییە بەناوبانگەکە بەرهەمدەهێنرێت، لە 30ی حوزەیرانی ساڵی 2028 لە سینەماکانی جیهان نمایش بکرێت، ئەمەش دوای چەندین ساڵ لە دەنگۆ و چاوەڕوانی بۆ بینینی ئەم یارییە وەک پڕۆژەیەکی سینەمایی.

بڵاوبوونەوەی Black Flag لەم کاتەدا وەک هەوڵێک دەبینرێت بۆ زیندووکردنەوەی ناوبانگی زنجیرەکە، بەتایبەت کە ئەم بەشە بەهۆی کەشی دەریاوانی و چەتەگەرییەوە تایبەتمەندییەکی زۆری هەیە. لە لایەکی دیکەوە، پڕۆژەی Call of Duty لە سینەمادا ڕکابەرایەتییەکی توند بۆ فیلمە جەنگییەکانی دیکە دروست دەکات و بودجەیەکی خەیاڵی بۆ تەرخان کراوە.

ئەم دوو پڕۆژەیە پێکەوە نیشانەی ئەوەن کە کۆمپانیاکانی گەیمینگ چیتر تەنها کار لەسەر ناوخۆی پیشەسازییەکە ناکەن، بەڵکو دەیانەوێت ببنە بەشێکی سەرەکی لە کات بەسەربردنی گشتی و پیشەسازی سینەما لە جیهاندا.

سەرچاوە: IGN, GameSpot

PM:09:00:18/04/2026

ئه‌م بابه‌ته 76 جار خوێنراوه‌ته‌وه‌‌