خەڵاتی ملیۆن دۆلاریی "ویندهام 

کامبێڵ" بۆ ساڵی 2026 ڕاگەیەندرا

وێستگە ستایل - سۆلین عوسمان

بۆ ساڵی 2026، دامەزراوەی خەڵاتە ئەدەبییەکانی ویندهام کامبێڵ ناوی هەشت نووسەری نێودەوڵەتی وەک براوەی ئەمساڵ ڕاگەیاند. ئەم خەڵاتە کە بە یەکێک لە گرانبەهاترین خەڵاتە ئەدەبییەکانی جیهان دادەنرێت، ساڵانە بەسەر ئەو نووسەرانەدا دابەش دەکرێت کە داهێنانیان لە بوارەکانی ڕۆمان، شیعر، دراما و بەرهەمی نا-خەیاڵیدا کردووە.

براوەکانی ئەمساڵ بریتین لە: Gwendoline Riley بۆ باشترین ڕۆمانی کورت، Adam Ehrlich Sachs بۆ باشترین ڕۆمان، Joyelle McSweeney کە توانی دوو خەڵات بۆ باشترین ژیاننامە و باشترین شیعر بباتەوە، هەروەها Kei Miller بۆ لێکۆڵینەوە، Karen Solie بۆ خەڵاتی تایبەتی دۆناڵد ویندهام، و هەریەک لە S Shakthidharan و Christina Anderson بۆ باشترین دەقی شانۆیی. ئامانجی سەرەکی ئەم خەڵاتە دابینکردنی سەربەخۆیی داراییە بۆ نووسەران تا بتوانن بەبێ خەمی بژێوی، بەردەوام بن لە نووسین.

سیستەمی ئەم خەڵاتە زۆر سەرنجڕاکێشە، چونکە ساڵانە زیاتر لە ملیۆنێک و 400 هەزار دۆلار تەرخان دەکرێت و هەر براوەیەک بڕی 175 هەزار دۆلاری وەک پاداشت پێ دەدرێت. ئەم بڕە پارەیە هاوکارییەکی گەورەیە بۆ ئەوەی نووسەرەکان کەشێکی ئازاد و گونجاویان بۆ بڕەخسێت و تەنها سەرنجیان لەسەر بەرهەمهێنانی کاری ئەدەبی باڵا بێت.

ئەم خەڵاتە کە لە ساڵی 2013 لە بەریتانیا دامەزراوە، لە ماوەی 13 ساڵی ڕابردوودا توانیویەتی ببێتە پێگەیەکی گرنگ بۆ ناساندنی نووسەرە داهێنەرەکان. ساڵی 2017 پۆلی شیعری بۆ زیاد کرا و ئێستا یەکێکە لەو دەگمەن خەڵاتانەی کە جیهان بە تامەزرۆییەوە چاوەڕێی ڕاگەیاندنی ناوەکان دەکات.

سەرچاوە: Windham-Campbell Prizes (Yale University), The Guardian

PM:08:58:18/04/2026

ئه‌م بابه‌ته 48 جار خوێنراوه‌ته‌وه‌‌