دوای چوار ڕۆژ لە ململانێ لەگەڵ مردن، ئەو بووکە گەنجەی لە کامپێکی دهۆک سووتا گیانی لەدەستدا

وێستگە ستایل - سۆلین عوسمان

جارێکی دیکە هەواڵێکی دڵتەزێن لە کەمپی ئاوارەکانەوە ڕادەگەیەنرێت و ئافرەتێکی گەنج کە تەنها چوار مانگ بوو ژیانی هاوسەری پێکهێنابوو، بەهۆی سەختی برینەکەیەوە کۆچی دوایی کرد. ئەم رووداوە دوای ئەوە دێت کە چوار رۆژ لەمەوبەر ئاگر لە خێوەتەکەیان کەوتەوە و بووە هۆی سووتانی بەشێکی زۆری جەستەی و گواستنەوەی بۆ نەخۆشخانە، بەڵام دواجار چارەسەرە پزیشکییەکان نەیانتوانی ژیانی ڕزگار بکەن.

رووداوەکە لە کەمپی (داوودییە) لە سنووری قەزای ئامێدی سەر بە پارێزگای دهۆک روویداوە. قوربانییەکە ناوی (چنار سەعید)ە و خەڵکی قەزای شنگالە، کە بەهۆی بارودۆخی ناوچەکەیانەوە لەگەڵ خێزانەکەیدا لەو کەمپە نیشتەجێ بوون. چوار رۆژ لەمەوبەر بەهۆکارێکی نادیار ئاگر لە شوێنی نیشتەجێبوونیان کەوتەوە و لە ئەنجامدا چنار بە سەختی بریندار بوو و گوازرایەوە بۆ بەشی سووتاوی لە شاری دهۆک.

بەپێی زانیارییەکان، سەرەڕای هەوڵە بەردەوامەکانی تیمی پزیشکی پسپۆڕ لە یەکێک لە نەخۆشخانەکانی شاری دهۆک بۆ ڕزگارکردنی ژیانی، بەڵام بەهۆی رێژەی زۆری سووتاوییەکەی و کاریگەرییە توندەکانی ئاگرەکە لەسەر جەستەی، دواجار بەرەبەیانی ئەمڕۆ شەممە، ٣١ی کانوونی دووەمی ٢٠٢٦، چنار سەعید ماڵئاوایی لە ژیان کرد و گیانی سپارد.

ئەوەی ئازاری ئەم رووداوەی بۆ خەڵکی ناوچەکە و کەسوکاری زیاتر کردووە، لایەنە مرۆییەکەیەتی؛ چونکە ئەم ئافرەتە گەنجە تەنها چوار مانگ بوو پرۆسەی هاوسەرگیری ئەنجامدابوو و لە سەرەتای ژیانی نوێیدا بوو. کەمپەکانی ئاوارەکان بەهۆی نەبوونی پێداویستی تەواوی سەلامەتی و نزیکی خێوەتەکان لە یەکتری، زۆرجار دەبنە مەیدانی رووداوی لەم شێوەیە و ساڵانە چەندین کەس بەهۆی کەوتنەوەی ئاگر لە ناو خێوەتەکاندا دەبنە قوربانی.

مەرگی ئەم بووکە گەنجە بووەتە هۆی خەمبارییەکی گەورە بۆ کەسوکارەکەی و دانیشتووانی کەمپی داوودییە. لە ئێستادا تەرمەکەی رادەستی خێزانەکەی کراوەتەوە بۆ ئەوەی ڕێکارە ئایینییەکانی بۆ ئەنجام بدرێت و لە زێدی خۆی بە خاک بسپێردرێت، لە کاتێکدا لایەنە پەیوەندیدارەکان بەردەوامن لە لێکۆڵینەوە بۆ دەستنیشانکردنی هۆکاری سەرەکی کەوتنەوەی ئاگرەکە.

PM:06:21:31/01/2026

ئه‌م بابه‌ته 88 جار خوێنراوه‌ته‌وه‌‌