فێستیڤاڵی "إشراقات" لە دیمەشق؛ هەوڵێک بۆ زیندووکردنەوەی کلتوور و هونەری سوریا
وێستگە ستایل - سۆلین عوسمان
لە کاتێکدا سوریا هەوڵی چاکبوونەوە و تێپەڕاندنی قەیرانەکان دەدات، فێستیڤاڵی "إشراقات" لە شاری دیمەشق دەستیپێکرد و هۆڵی ئۆپێرای کردە ناوەندێکی گەورە بۆ نیشاندانی داهێنانی هونەری و یەکگرتوویی کلتووری وڵاتەکە.
ئەم فێستیڤاڵە کە لەلایەن ڕێکخراوی UNDP و ڕێکخراوی "ڤایۆلێت" ڕێکخرابوو، بۆ ماوەی پێنج ڕۆژ بەردەوام بوو و تێیدا کۆمەڵێکی زۆر لە هونەرمەندان و پارێزەرانی کلتوور لە هەموو ناوچەکانی سوریاوە کۆبوونەوە بۆ ئەوەی پێکەوە مێژوو و ناسنامەی خۆیان بەرز ڕابگرن.
چالاکییەکانی فێستیڤاڵەکە هەمەجۆر بوون، لەوانە پێشانگای هونەری شێوەکاری، نمایشکردنی کاری دەستی و میراتی نەتەوەیی، هەروەها چەندین گۆشەی کارلێکەر کە تێیدا ئامادەبووان دەتوانین ڕاستەوخۆ ئاشنای چیرۆک و پیشە کۆنەکانی سوریا ببن.
ئەم دەستپێشخەرییە کە بە پاڵپشتی حکومەتی ژاپۆن و وەزارەتەکانی کلتوور و وەرزشی سوریا ئەنجامدراوە، جەخت لەوە دەکاتەوە کە کلتوور بەهێزترین ئامرازە بۆ کۆکردنەوەی خەڵک و دروستکردنەوەی متمانە و ئاشتی لەناو کۆمەڵگەیەکدا کە ساڵانێکی زۆر بەدەست جەنگەوە ناڵاندوویەتی.
فێستیڤاڵەکە تەنها پێشانگایەکی ئاسایی نەبوو، بەڵکو پەیامێکی ڕوون بوو بۆ جیهان کە گەلی سوریا سەرەڕای هەموو ئاستەنگەکان، هێشتا خاوەنی ئیرادەیەکی بەهێزن بۆ پاراستنی جوانی و داهێنان و بەکارهێنانی هونەر وەک زمانێکی هاوبەش بۆ گفتوگۆ.
سەرچاوە: بەرنامەی گەشەپێدانی نەتەوە یەکگرتووەکان (UNDP)
PM:09:39:16/02/2026