دوای گەڕاندنەوەی پارێزبەندی بۆی، سۆران عومەر پەیامێک بڵاودەکاتەوە

‌

سۆران عومەر، ئەندامی فراکسیۆنی کۆمەڵ لە پەرلەمانی کوردستان لە راگەیەنراوێکدا ئاماژەی بەوەکردوە، "دوای ئەوەی بەنایاسایی کۆبونەوەی 7ی ئایار ئەنجامدرا بۆ ھەڵگرتنی پارێزبەندی سەر بەندە، پاشان بڕیاری ژمارە 4ی لێکەوتەوە، لە 19ی ئایار تانەیەکم ئاراستەی بەڕێز سەرۆکی پەرلەمان کردو داوای ھەڵوەشاندنەوەی ئەو بڕیارە نایاساییەم کرد، پشت بەستوو بەمادەکانی پەیڕەوی ناوخۆ، لەپێناو گێڕانەوەی شکۆ بۆ پەرلەمانی کوردستان و دەسەڵاتی سەرۆکی پەرلەمان تاکو ئەم بڕیارە نایاساییە نەبێتە پێشینەکی نایاسایی خراپ کەمەترسی بوو بۆ کاری پەرلەمانی".

باسی لەوەشکردوە، سوپاسی سەرۆکی پەرلەمان دەکەن بۆ ھەڵوەشاندنەوەی بڕیاری ژمارە ٤ ی ھەڵگرتنی پارێزبەندی، ئەو کەسانەشی پێی وایە ئەم بڕیارەی سەرۆکی پەرلەمان دەباتە ئەنجومەنی شورا نایاساییە و لەدەسەڵاتی جێگری سەرۆکی پەرلەمان نیە نوسراو ئاراستەی ئەنجومەنی شورا بکات، پشت بەستوو بە بڕگەی یەکەم لەمادەی دەیەم لە یاسای ژمارە 14ی ساڵی 2008ی ئەنجومەنی شورا، تەنھا لەدەسەڵاتی سەرۆکی پەرلەمانە داوای ڕاوبۆچون لە ئەنجومەنی شورا بکات.

لەبارەی گرتنەبەری رێکاری دیکەش لەلایەن ئەو فراکسیۆنانەی بڕیارەکەیان دەرکردوە سۆران عومەر دەڵێت، ئەگەر ئەو لایەنانە دادگاش بگرنەبەر، ھیچ بڕیارو کۆبونەوەیەکی پەرلەمان ناکەوێتە تایبەتمەندی دادگای کارگێڕی بۆ تانە لێدان.