هاوپەیمانی نیشتیمانی داوای بەپەلە ئەنجامدانی کۆبونەوەی پەرلەمانی کوردستان دەکات
وێستگەنیوز:
هاوپەیمانی نیشتیمانی کە ئارام قادر سەرۆکایەتی دەکات داوا دەکات کۆبونەوەی
پەرلەمانی کوردستان ئەنجام بدرێت لەزوترین کاتدا.
ئەمرۆ دوشەممە دوای دواخستنی
کۆبونەی پەرلەمان و بەتایبەت هەڵبژاردنی دەستەی سەرۆکایەتی پەرلەمانی کوردستان
ڕاگەیاندراوێکی بڵاوکردەوە.
هاوپەیمانیی نیشتمانی ڕایگەیاندوە "كۆبوونەوەی چاوەڕوانكراوی
پەرلەمانی هەرێمی كوردستان بۆ هەڵبژاردنی دەستەی سەرۆكایەتیی پەرلەمان دەزانین بۆ
دەستكردن بە كار و جێبەجیكردنی ئەركی پەرلەمان لە یاسادانان و چاودێریكردن، بەو
پێیەی دواكەوتنی هەڵبژاردنی دەستەی سەرۆكایەتیی پەرلەمان و لیژنەكان، زیانی بە
پێگەی سیاسی و ناوبانگی هەرێمی كوردستان گەیاندووە و پرۆسەی دیموكراسی و دۆخی
سروشتیی كاری دامەزراوە یاساییەكانی خستۆتە ژێر پرسیار، ئەمە جگە لەوەی دواكەوتنی
دەستبەكاربوونی پەرلەمان كاریگەریی نەرێنیی لەسەر دۆخی ژیان و بژێویی هاووڵاتیان
بووە و دەبێت، بۆیە هیوادارین بە زووترین كات كۆبوونەوەی پەرلەمانی كوردستان بۆ
هەڵبژاردنی دەستەی سەرۆكایەتی ئەنجامبدرێت و تەواوی فراكسیۆن و پێكهاتە جیاوازەكان
بەشداربن".
هاوپەیمانی نیشتیمانی ئاماژەی بەوەداوە " لە سەروبەندی دەستپێكی كاری پەرلەمان و پێكهێنانی حكومەتی داهاتوو،
هاوپەیمانیی نیشتمانی لەگەڵ بوونی پەرلەمانێكی كارا و حكومەتێكی خزمەتگوزاردایە،
هاوپەیمانی بە ئەركی نیشتمانی و ستراتیجیی خۆی دەزانێت كە چاودێری كارەكانی حكومەت
بكات و ڕەخنە لە كەموكورتییەكان بگرێت، وێڕای ئەوەش، پڕۆژەیاسا پێشكەش بە پەرلەمان
و حكومەت دەكەین كە لە بەرژەوەندی و خزمەتی هاووڵاتیاندا بێت، هاوپەیمانی ئامادەیە
بۆ هاوكارییكردنی حكومەت و پەرلەمان لەو بابەت و پرسانەی كە خزمەت بە پرسە
نیشتمانییەکان دەكەن، بۆیە هیوادارین ئەم خولەی پەرلەمانی كوردستان لە جێبەجێكردنی
ئەركە دیاریکراو و یاساییەكانیدا سەركەوتوو بێت، هەروەها حكومەتێكی خزمەتگوزار و
هاووڵاتیدۆست پێكبێت".
هاوپەیمانیی نیشتمانی ئەوەشی وتوە "ئەوان بەرهەڵستكارێكی جددی دەبێت
بۆ دیاردە و دەردی گەندەڵی و بەفیڕۆدانی سامانی گشتی و سەرچاوەكانی وزە، بۆ ئەم
مەبەستەش هەماهەنگیی تەواومان دەبێت لەگەڵ فراكسیۆنەكانی پەرلەمان و حكومەتی
هەرێمی كوردستان، دڵنیاین گەر ویستی چاكسازی هەبێت، توانای باشتركردنی دۆخی سیاسی
و ئابوری و كۆمەڵایەتی و ژیانی هاووڵاتیان هەیە.هەرچی تایبەتە بە بەشدارییپێكردنی پێكهاتەی توركمان و پێدانی جێگری دووەمی
سەرۆكی پەرلەمانی هەرێمی كوردستان، هاوپەیمانیی نیشتمانی لە بڕوابوونی بە ستراتیجییەتی پێكەوەژیانی سیاسی و
نەتەوەیی پشتگیری لەو هەنگاوە دەكات و خوازیارە پێكهاتەكانی دیكەی مەسیحی و ئێزدی
و كاكەیی ڕۆڵی گرنگ و كارایان پێبدرێت لەپێناو دروستكردنی ژیانێكی شایستە بە
هاووڵاتیانی هەرێمی كوردستان".
ئەوەش دوای ئەوە دێت کە ئەمرۆ دوای ١٤١ ڕۆژ لە دواکەوتنی هەڵبژاردنی
پەرلەمانی کوردستان، بەڵام تا ئامادەکردنی ئەم هەواڵە یەکێتی و پارتی لەسەر
پێکهێنانی حکومەت و دیاریکردنی دەستەی سەرۆکایەتی پەرلەمانی کوردستان نەگەیشتونەتە
ڕیککەوتن.
هــ. ب
PM:02:44:18/02/2019
ئه‌م بابه‌ته 776
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت