لاهور شێخ جه‌نگی: کەی رەوایە هەرێمێک نەوت و داهاتی ناوخۆیی هەبێت، نەتوانرێ مووچە لە کاتی خۆیدا بدرێ؟
لاهور شێخ جەنگى
وێستگه‌نیوزـ
لاهور شێخ جەنگى لە پەیامێکی ڤیدیۆیدا پیرۆزبایی جەژنی نەورۆز لە گەلی کورد دەکات و دەڵێت، کەی رەوایە هەرێمێک نەوتی هەبێت، داهاتی ناوخۆیی زۆری هەبێت، نەتوانرێت مووچە لە کاتی خۆیدا بدرێت.
لاهور جەنگی، ئەمڕۆ چوارشه‌ممه 20ی ئاداری 2024، لە پەیامێکی ڤیدیۆیدا رایگەیاند: دوای پتر لە 33 ساڵ دەرفەت، لە ناو شکستێکی قووڵدا دەژیات، شکستێک کە بەرهەمی عەقڵیەتێکی خۆسەپێن و گوێنەدان بووە بە خواست و ئیرادەی خەڵک.
وتیشی، "خۆم لە هیچ بەرپرسیارێتیەک لانادەم، لام سەیرە دەسەڵاتداران هێشتا لەبری دانپێدانان بە شکست پاساو ریز دەکەن، بە رای ئێمە ئەم ئینکارییە بەشێکی گەورەی تۆخکردنەوە و بەردەوامیدانە بە شکست".
ئاماژەی بەوەشداوە، نموونەی ئەو گەل و ئەزموونانەی شکستیان گۆڕیوە بۆ سەرکەوتن لە مێژوودا زۆرن و ئێمە دەبێت ئەو ئیرادەیەمان هەبێت، کە سنوورێک بۆ ئەم شکستەی حوکمڕانی دابنێین و سەرەتایەکی نوێ دەست پێ بکەین.
لاهور شێخ جەنگى، لە درێژەی پەیامەکەیدا دەڵێت، کەی رەوایە هەرێمێک نەوتی هەبێت، داهاتی ناوخۆیی زۆری هەبێت، نەتوانرێت مووچە لە کاتی خۆیدا بدرێ؟، رێگاکانی هەستانەوەی دوای کەوتن و شکست زۆرن خێراترینیان ئەوەیە بکەرە سەرەکییەکان دان بە شکستدا بنێن، بۆ ئەوەی بتوانن لە واقعی خۆیان تێبگەن جا بە خۆ گۆڕین یان چۆڵکردنی کورسی و دەسەڵات، بریاری یەکلاکەرەوەم داوە بەشێك بم لە ئیرادەی هەستانەوە.
راشیگەیاند: پاش چەند سالێک چوونە دەرەوە یان وەدەرنانم لەو حزبەی کە هەموو تەمەنی گەنجێتیم تێدا سەرفکرد ئێستا وێنەی حوکمڕانی، هەڵە و هەل و دەرفەتەکان رونتر دەبینم و مەبەستمە بەشێک بم لە چارەسەر و گۆڕانکاری
دەشڵێت: "هێشتا دیار نییە دەسەڵاتدارانی هەرێم هەڵبژاردن ئەنجام دەدەن یاخود نا؟ کە ئەمە هەر متمانەی خەڵکی خۆمانی بە دەزگا نیشتیمانیەکان کەم نەکردوە، بەڵکو کۆمەڵگەی نێودەوڵەتیش کە هیوای زۆریان لەسەر هەرێم و ئەزمونەکەی هەڵچنیبوو ئێستا بێزارن، ئەمە دەبێت کۆتایی پێ بێت و سەرەتایەکی تازە دەست پێبکرێ، ئێمە دەمانەوێ بە ئیرادەیەکی گەورەوە بەشێک بین لەو سەرەتا تازەیە".
PM:08:13:20/03/2024
ئه‌م بابه‌ته 872
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت