هەنار دەبێتەوە بە جێگەی سەرنج؛ میوەیەکی جادوویی بۆ پاراستنی تەندروستیی دڵ
وێستگە ستایل-
هەنار دەبێتەوە بە جێگەی سەرنج؛ میوەیەکی جادوویی بۆ پاراستنی تەندروستیی دڵ
وێستگە ستایل - سۆلین عوسمان
هەنار جارێکی دیکە لە ناوەندە پزیشکییەکاندا بووەوە بە باسی ڕۆژ، ئەمەش دوای ئەوەی چەندین توێژینەوە جەختیان لەوە کردەوە کە ئەم میوەیە یەکێکە لە باشترین پارێزەرەکانی دڵ کە تا ئێستا ناسرابێت.
توێژەران دەڵێن هەنار بە شێوەیەکی سەرسوڕهێنەر دەوڵەمەندە بە "پۆلیفینۆڵ" و دژەئۆکسانەکان، کە یارمەتیدەرێکی گەورەن بۆ کەمکردنەوەی هەوکردنی ناو دەمارەکان و باشترکردنی کارکردنی بۆرییەکانی خوێن. خواردنی بەردەوامی هەنار یان ئاوەکەی دەبێتە هۆی باشتربوونی سووڕی خوێن و کەمکردنەوەی مەترسییەکانی جەڵتە و نەخۆشییەکانی دڵ.
ئەو کەسانەی بایەخ بە تەندروستی خۆیان دەدەن، لە ئێستادا زیاتر پەنا بۆ خواردنی دەنکە هەناری فرێش یان شەربەتی هەناری سروشتی دەبەن لەبری ئەو خواردنەوانەی شەکری دەستکردیان تێدایە، بەتایبەتی لەو ناوچانەی کە ڕێژەی نەخۆشییەکانی دڵ تێیاندا بەرزە.
ئەم میوەیە لە مێژوودا خاوەن پێگەیەکی پیرۆز بووە و لە کولتوورە فارسی، یۆنانی و مێزۆپۆتامییەکاندا (نێوان دوو ئاوان) وەک هێمای ژیان، پیت و فەڕ و نوێبوونەوە سەیر کراوە. بەکارهێنانی بۆ مەبەستی پزیشکی بۆ هەزاران ساڵ پێش ئێستا دەگەڕێتەوە.
لەگەڵ ئەوەی تەندروستی دڵ و دەمارەکان لە ئێستادا ئەولەوییەتێکی جیهانییە، هەنار تەنیا وەک میوەیەکی وەرزیی و لوکس نابینرێت، بەڵکو وەک دەرمانێکی خۆراکیی کاریگەر سەیری دەکرێت کە سوودە ڕاستەقینەکانی بۆ هەمووان سەلمێنراوە.
زانیارییەکان لە توێژینەوەکانی تایبەت بە نەخۆشییەکانی دڵ و دەقە مێژووییە پزیشکییەکان وەرگیراون.
PM:03:35:30/12/2025
ئهم بابهته 80
جار خوێنراوهتهوه