گرنگییەکانی سیستەمی بەرگری چاوی مرۆڤ کامانەن ؟
وێستگە ستایل-
چاوەکانمان سیستەمێکی وردی خۆپاراستنیان هەیە، چەندین شێوازی خۆپارێزی دژی میکرۆب و تەپوتۆز و زەبری دەرەکی بەکاردەهێنن، ئەم سیستەمە ئاڵۆزە دەکرێت بەرگری لە چاوی مرۆڤ بکات و لە هەموو زیانێک بیپارێزێت، دکتۆر ماکۆک محمد پسپۆڕی نەشتەرگەری و نەخۆشییەکانی چاو لەم باسەدا 10 پێکهاتەی گرنگی بەرگەری دەخاتەڕوو کە دەتوانن چاوەکان بپارێزن لە مەترسییە دەرەکییەکان کە بریتین لە :
1- برۆ: ڕێگرە لە هاتنەخوارەوەی عارەق و پیسی بۆ ناو چاو.
2- پێڵوو: ڕێگرە لە زەبری دەرەکی و لە کاتی مەترسیدا زۆر بە خێرایی دادەخرێت بۆ پاراستنی چاوەکە، وە ئەگەر تەنێکی نامۆ لە چاوەکەشدا بێت، بە تروکاندن فڕێی دەداتە دەرەوە.
3- برژانگ: ڕێگرە لە چونەژوورەوەی تەنی نامۆ و تۆز و مێروو.
4- لینجەپەردە و سپێنەی چاو: بەشەکانی ناوەوەی چاو دەپارێزن لە زەبری دەرەکی و میکرۆب.
5- فرمێسک: بەردەوام ناو چاوەکە دەشوات و ماددەی دژە میکرۆب و چەندین ماددەی تری تێدایە بۆ پاراستنی گلێنەی چاو.
6- کاسەی چاو: ئێسکێکی بەهێزە و گلێنەی چاوەکە لە زەبری دەرەکی دەپارێزێت.
7- چەوری نێوان کاسەی چاو و گلێنە (fat cushion): وەکو کوشنێکی نەرم چاوەکە لە گەیاندنی زەبر دەپارێزت.
8- شوشێنەی چاو: جگە لە باشترکردنی بینایی، چاویش دەپارێزێت لە چونە ژوورەوەی پیسی و میکرۆب.
9- عەدەسەی چاو: جگە لە باشترکردنی بینایی، تۆڕەی چاویش دەپارێزێت لە بەرکەوتنی تیشکی زیانبەخشی خۆر.
10- بیلبیلە: لە کاتی بوونی تیشکی بەهێزدا، بیلبیلە بچوک دەبێتەوە و ناهێڵێت بڕێکی زۆر ڕووناکی بچێتە ناو چاوەکە و زیان بە تۆڕەی چاو بگەیەنێت.
PM:01:12:13/08/2025
ئه‌م بابه‌ته 960
جار خوێنراوه‌ته‌وه