نەخۆشی ناڕازیبوون لە شێوەی ڕووخسار و جەستە چییە ؟
وێستگە ستایل-
نەخۆشی ناڕازیبوون لە شێوەی ڕووخسار و جەستە کە ناوە زانستییە پزیشکییەکەی"Body Dysmorphic Disorder" ە حاڵەتێکی دەروونییە کە تێیدا کەسەکە هەست بە کەموکوڕی و شەرمەزاری دەکات سەبارەت بە جێگەیەکی دیاریکراوی جەستەی خۆی بە جۆرێک دەبێتە هۆی ناجێگیری باری دەروونی ئەو کەسە و وای لێدەکات هەتا بتوانێت دووربکەوێتەوە لە پەیوەندی و تێکەڵبوونە کۆمەڵایەتییەکان، لە ڕاستیدا ئەو هەستەی نەخۆشەکە بۆی پەیدادەبێت بە هیچ جۆرێک لای خەڵک بەو شێوەیە نابینرێت.
- نیشانەکانی ئەم نەخۆشییە دەرونییە بەم جۆرەن:
1- باوەڕێکی بەهێز بە هەبوونی کەموکوڕیەک لە جەستە یاخود ڕووخساردا کە وای لێدەکات بە جۆرێک بیربکاتەوە کە خەڵک بە ناشرین ئەو دەبینن.
2- بە جۆڕیک بیردەکاتەوە کە خەڵک هەمیشە چاویان لەسەر ئەوە و گاڵتەی پێدەکەن.
3- بە بەردەوامی خۆی بەراورد دەکات بە کەسانی دەوروبەری.
4- بەسەربردنی کاتێکی زۆری ڕۆژانە بە تەماشاکردنی خۆی لە بەردەم ئاوێنەدا.
5- هەوڵدان بۆ شاردنەوەی کەموکوڕییەکان لە ڕێگەی جلوبەرگ یاخود ئارایشتەوە.
6- دوورکەوتنەوە لە کۆبوونەوە خێزانییەکان و چوونەدەرەوەی هاوڕێیان.
7- هەمیشە پرسیار دەکات سەبارەت بە چۆنیەتی دەرکەوتنی لە لای کەسانی دەوروبەر.
8- پەنابردنە بەر نەشتەرگەری جوانکاری و زیادەڕەویکردن تیایاندا.
- ڕێگاکانی چارەسەری ئەم نەخۆشییە بەم جۆرەن:
1- سەردانیکردنی پزیشکی دەروونی و وەرگرتنی چەند دانیشتنێک لەگەڵ چارەسەرکاری دەروونیدا.
2- بەکارهێنانی دەرمانەکانی دژە خەمۆکی لە جۆری SSRI.
3- پەیڕەوکردنی ڕیگاکانی یەکەم و دووهەم پێکەوە.
PM:12:55:13/08/2025
ئه‌م بابه‌ته 1064
جار خوێنراوه‌ته‌وه