هۆکارەکانی لاوازی منداڵی خوار یەک ساڵ کامانەن ؟
وێستگە ستایل-
وەک ئاشکرایە لاوازی جەستەی منداڵان حاڵەتێکی باوە بەڵام پێویستی بە پشکنین و بەدواداچوون هەیە بە مەبەستی چارەسەرکردنی، بەتایبەتتر ئەگەر منداڵەکە تەمەنی خوار 1 ساڵ بێت نابێت پشتگوێبخرێت، دکتۆر پشدەر عبداللە پسپۆڕی نەخۆشییەکانی منداڵان و گەشەی منداڵان لەم باسەدا سەرەکیترین هۆکارەکانی لاوازی منداڵی تەمەن خوار یەک ساڵ ڕووندەکاتەوە کە بریتین لە :
1- لەوانەیە منداڵەکە ووزەی پێویستی بۆ گەشەی دەستنەکەوێت ئەویش بەهۆی بەهەڵە ئامادەکردنی شیری قووتو ،یان کێشەی شیر پێدانی سرووشتیان هەبێت ، یان بەهەڵە دەست بە خواردن و میوە بکەن.
2- منداڵەکە زۆر کەم خواردن و شیر بخوات ئەویش لەوانەیە هۆکارەکەی کێشەیەکی تەندروستی بێت وەک ئیفلیجی مێشک یان دووشەق بوونی لێوو مەڵاشوی زگماکی.
3- لەوانەیە کێشەیان لە سیستەمی هەرس و جگەردا هەبێت، وەک هەڵهێنانەوەی شیرو خواردن لە گەدەوە بۆ سورێنچک و دەم ،نەخۆشی سیستیک فایبرۆسیس ، سکچوونی درێژخایەن ، یان نەخۆشی هەستیاری بە گەنم.
4- قبوڵنەکردن و هەستیاری بەهەندێک خواردن وەک هەستیاری بە پڕۆتینی شیر.
5- بوونی هەندێک نەخۆشی وەک نەخۆشی لە کۆئەندامی کوێرەڕژێنەکان، دڵ یان کۆئەندامی هەناسە، ئەو منداڵانەی ئەو نەخۆشیانەیان هەیە جگە لەوەی پێویستیان بە ووزەی زیاترە بەراورد بە منداڵێکی ئاسایی ،لەهەمان کاتدا توانای خواردنیان خراپە و ووزەی کەمتریان دەستدەکەوێت بەراورد بە منداڵێکی ئاسایی.
6- هەوکردن هەبێت، ئەو منداڵانە پێویستیان بە ووزەیەکی زۆرتر هەیە بۆ زاڵبوون بەسەر نەخۆشیەکەیاندا لەچاو منداڵێکی ساغ بەڵام بەهۆی نەخۆشیەکەیانەوە ناتوانن وەک منداڵێکی ساغ خواردن و شیریش بخۆن.
7- ئەو منداڵانەی کێشەیان لە پڕۆسەی میتابۆلیزمدا هەیە واتە توانای پڕۆسەی لێک هەڵوەشاندن و بەکارهێنانی ئەو خواردنانەیان نیە کە ئەیخۆن بۆیە سوودی لێنابینن.
PM:01:34:11/08/2025
ئه‌م بابه‌ته 816
جار خوێنراوه‌ته‌وه