ئەکتەرەکان مافی بەکارهێنانی "هاوشێوەیە دیجیتاڵییەکانیان" بۆ هەتاهەتایە دەفرۆشن
وێستگە ستایل-
ئەکتەرەکان مافی بەکارهێنانی "هاوشێوەیە دیجیتاڵییەکانیان" بۆ هەتاهەتایە دەفرۆشن
وێستگە ستایل - سۆلین عوسمان
هۆلیوود دەچێتە سەردەمێکی نوێوە کە تێیدا ئەکتەرەکان دەتوانن لەسەر شاشەی سینەما دەربکەون تەنانەت دوای چەندین ساڵ لە جێهێشتنی کارەکانیان، ئەمەش بەهۆی دروستکردنی کۆپییەکی دیجیتاڵیی وردی خۆیان کە بە یاسا پارێزراوە.
ستۆدیۆکان و ئەکتەرەکان ئێستا خەریکی واژۆکردنی گرێبەستێکن کە ڕێگە دەدات بە نەوەیەکی نوێی ئەکتەری دروستکراو بە ژیریی دەستکرد (AI) لە فیلمەکانی داهاتوودا بەکاربهێنرێن، بەڵام بە مەرجی وەرگرتنی ڕەزامەندی پێشوەختە و دیاریکردنی قەرەبووی دارایی بۆ ئەکتەرەکە یان خێزانەکەی.
لە ڕێگەی سکانکردنی یەکجار ورد و بە کوالێتی بەرز، ئێستا تەنها ڕوخسار کۆپی ناکرێت، بەڵکو بچووکترین دەربڕینەکانی دەموچاو، شێوازی دەنگ و جوڵە فیزیکییەکانیش تۆمار دەکرێن. ئەم هاوشێوە دیجیتاڵییانە دەتوانن لەناو دیمەنەکاندا بەشداری بکەن بەبێ ئەوەی پێویست بکات ئەکتەرەکە خۆی لە شوێنی وێنەگرتنەکە ئامادە بێت.
ئەم کارە هەندێک نیگەرانی ئەخلاقی دروستکردووە، بەتایبەتی دوای ئەو مشتومڕانەی لەسەر بەکارهێنانی وێنەی کەسایەتییەکان بەبێ مۆڵەت دروستبوون. ڕێککەوتنە نوێیەکان ئامانجیان ئەوەیە ناسنامەی هونەری ئەکتەرەکان بپارێزن و ڕێگری بکەن لە هەر بەکارهێنانێکی نەشیاو.
ئەگەر ئەم تەکنەلۆژیایە بە بەرپرسیارییەوە بەکاربهێنرێت، دەکرێت تێچووی بەرهەمهێنانی فیلمە گەورەکان کەم بکاتەوە و لە هەمان کاتدا دەرفەت بداتە ئەکتەرەکان کە کۆنترۆڵی تەواوی کارەکتەرە دیجیتاڵییەکانی خۆیان بکەن تەنانەت بۆ داهاتووش.
سەرچاوە: ماڵپەڕی (The Hollywood Reporter).
PM:06:38:28/12/2025
ئهم بابهته 52
جار خوێنراوهتهوه