بەوێنە.. نەزرکردنی خواردن لە یادی شەهیدکردنی ئیمام حسێن


وێستگە نیوز- 

نەزرکردنی خواردن و دابەشکردنی بەسەر ماتەمگێرانی یادی شەهیدکردنی ئیمام حسێن لە سەرجەم پارێزگاکانی ئێران بووەتە نەریتێکی ساڵانە و زیاتر شوێنه‌كه‌وتوانی مه‌زهه‌بی شیعه‌ ئه‌نجامی ده‌ده‌ن. 

نه‌ریتی نه‌زركردنی خواردن هه‌ر تایبه‌ت نییه‌ به‌ شیعه‌كان، به‌ڵكو ئەمه‌ نەریتێكی كۆنه‌ و لە ئێستاشدا لەناو موسڵمانان و تەنانەت لەناو پەیڕەوانی ئاینەکانی دیکەشدا وەک ئەرمەنیەکان و زەردەشتیەکان لە بۆنە جیاوازەکاندا نه‌ریتی نه‌زركردنی خواردن هه‌یه‌. 

نەریتی نەزرکردن تەنها خواردن ناگرێتەوە بەڵکو هه‌ندێكجار به‌ قوماش وەک قوماشی سەوز و ڕەش، هه‌روه‌ها چەندین جۆر خواردن لە سه‌رجه‌م ناوچە و شوێنەکان دابەش دەکرێت.

شیعه‌كان پێیانوایە بە دابەشکردنی ئەو خواردن و کەلوپەلانە خۆشەویستی بۆ ئیمام حسێن نوێ دەکەنەوەو بەشێک لە پێداویستیەکانی خەڵکیش پڕ دەکەنەوە. 

یەکێک لە ماتەمگێڕانی مەراسیمەکە کە هەموو ساڵێک خواردن لەم یادەدا نەزردەکات و دابەشی دەکات، دەڵێت" هەموو ساڵێک خەڵکی هەژار و دەوڵەمەند لەسەر سفرەی یادی ئیمام حسێن کۆدەبنەوەو خواردنە پیرۆزکراوەکان دەخۆن، ئەو خواردنانەشی نەزری دەکەن پیرۆزییەکی تایبەتیان لای خەڵکەکە هەیە". 

وتیشی، " لە مانگی موحەڕەمدا خەڵکەکە ئەوپەڕی هەوڵی خۆیان دەدەن بۆ زیندوڕاگرتنی مەراسیمەکانی ماتەمگێڕان".

بەوتەی ئەو ماتەمگێڕە، ئەو خواردنانەی نەزردەکرێن و لە مەراسیمی ماتەمگێڕاندا دابەش دەکرێن بریتین لە هەریسە و مەکبوس و برنج بە شیرو شیرینی و کۆمەڵێک خواردنی دیکە. 

ش . ر 


PM:05:15:08/09/2019














ئه‌م بابه‌ته 1840 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت