شادی نەوزاد: هەڕەشەی بڵاوکردنەوەی فلیمی ڕوتیان لێکردوم

وێستگە نیوز-

دوو پەرلەمانتاری نەوەی نوی رایدەگەێنن "شاسوار عەبدولواحید لەرێگای پەیوەندی و نامەوە هەڕەشەی شەخسییان لێکردون".

تا دێت کێشە نێوخۆییەکانی جوڵانەوەی نەوەی قوڵتر دەبێتەوە و بەشێوەیەک گەیشتووەتە ئەو ئاستەی کە هەردوو لایان تۆمەت بۆ یەکتری دروست دەکەن.

لەدوایین کاردانەوەشدا ئەمڕۆ چوارشەممە هەریەکە لە شادی نەوزاد و سیروان بابان، پەرلەمانتارانی فراکسیۆنی نەوەی نوی لە پەرلەمانی کوردستان، کۆنگرەیەکی ڕۆژنامەوانیان ئەنجامدا و تیایدا هەڵوێستی خۆیان دەربارەی کێشە نێوخۆییەکانی نەوەی نوێ دەرخست.

شادی نەوزاد پەرلەمانتاری نەوەی نوێ لەکۆنگرە ڕۆژنامەوانییەکەدا رایگەیاند "ئەوان پێشتر وەکو ئەندامانی ئەنجومەنی باڵای نەوەی نوێ هەڵوێستی خۆیان دەربارەی خۆرخکاری و تاکڕەوییەکانی سەرۆکی جوڵانەوەکەیان راگەیاندوە و داوایانکردوە بۆ بەلارێدانەبردنی ئەو ئامانجانەی جوڵانەوەکەی لەسەر دروست بوە، ئەو تاکڕەویی نەمێنێت و رێکخراوەیی بۆ نێو جوڵانەوەکە بگەڕێتەوە".

شادی نەوزاد ئاشکرای کرد لەدوای ئەو هەڵوێستانەیانەوە هەرەشەی توندیان لێکراوە و ئاماژەی بەوەدا "لەچەند ڕۆژی رابردودا لەلایەن "باندەکەی شاسوار عەبدولواحید"ەوە هەڕەشەی توند و شەخسیان لێکراوە کە ئەگەر بێت و ئەم کەسە نارازییانە بێدەنگ نەبن و واز لەو هەڵوێستانەیان نەهێنن ئەوا چەندەها ڤیدیۆ و وێنەی دەستکاریکراوی نەشیاوی ئەوان بڵاو دەکەنەوە".

شادی نەوزاد باسی لەوەکرد "لەسەرەتای دروست بونی جوڵانەوەکەوە چەندین خۆبەخش و ئەندامی باڵای نەوەی نوێ لەشارەکانی دیکەی کوردستانەوە هاتونەتە سلێمانی و بۆ بەڕێوەبردنی کۆبونەوەکان و بانگەشەکانی هەڵبژاردن و کاری حیزبی لە شوقەکانی گوندی ئەڵمانی و کابینەکانی نێو چاڤی لاند ماونەتەوە، بەڵام بەداخەوە بەشێوەیەکی نهێنی وێنە و ڤیدیۆیی تایبەتیان گیراوە لەلایەن باندەکەی شاسوارەوە".

ئەو پەرلەمانتارەی نەوەی نوێ ئاماژەی بەوەدا "لەژێر دەسەڵاتی پارتی و یەکێتیدا ئەو جۆرە هەڕەشانەمان لێدەکرێت و ئەو باندەش هەڕەشەیان لە خۆم و ئەندامە ناڕازییەکانی نەوەی نوێ و ئەندامانی ئەنجومەنی باڵای جوڵانەوەکە کردوە و بەشەخسی نامەیان بۆ من ناردوە و پییان وتوم "چاوەڕوانبە لەوەش خراپتر دەکەین و فلیمی روتت بڵاو دەکەینەوە"، ئەو پەرلەمانتارە وێنەی نامەکەشی نیشانی ڕۆژنامەنوسان دا.

پەرلەمانتارەکەی نەوەی نوێ وتیشی "ئەوەی دەگوزەرێت باندگەراییە و شاسوار سەرۆکایەتیان دەکات، بەهۆی ئەو هەڕەشانەوە سکاڵا لەسەر شاسوار دەکەم لە دادگا و چونکە هەڕەشەی لێکردوین".

لەکۆتایی وتەکانیدا ئەو پەرلەمانتارە وتی "شاسوار و باندەکەی نەوەی نوێ نین و ئێمە نەوەی نوێی راستەقینەین و ئێمە دامان مەزراندوە و دەستی لێ هەڵناگیرن و هەموو ئەو کەسانە دەپارێزین کە بەوجۆرە هەڕەشانە دەیانەوێت ژیانیان بخەنە مەترسییەوە".

هاوکات کۆنگرەکەش لەلایەن کەناڵی ئێن ئار تی و چەند کەناڵێکی دیکەوە بەراستەوخۆ گواسترایەوە.

PM:01:38:24/04/2019

ئه‌م بابه‌ته 6520 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت