ناتانیاهۆ: هەرچەند ناکۆکیمان هەبێت لەگەڵ ئەمریکا لە کۆتاییدا ئێمە هاوبەش و هاوپەیمانێکی بەهێزی یەکترین

وێستگەنیوز-

ئەمڕۆ دووشەممە 15ی حوزەیرانی 2026، بنیامین ناتانیاهۆ، سەرۆک وەزیرانی ئیسرائیل لە کۆنگرەیەکی رۆژنامەوانیدا رایگەیاند، "رێگە نادەین رێکخراوە تیرۆریستییەکان لەسەر سنوورەکانمان جێگیر ببن".

ئاماژەی بەوەکرد، "زیانێکی گەورەمان بە ئێرانییەکان گەیاند و ئیسرائیلمان لە مەترسیی لەناوچوونی ئەتۆمی پاراست، ئەگەر بەپەلە هێرشمان نەکردایە سەر ئێران، دەستیان بە بۆمبی ئەتۆمی دەگەیشت".

ناتانیاهۆ وتی، "مەترسیی لەناوچوونی ئیسرائیل و دانیشتووانەکەیمان دوورخستەوە، هەروەها رەنج و خەباتمان هێشتا کۆتایی نەهاتووە".

ئەوەشی خستەڕوو، هێزەکانیان رێبەرانی ئێرانیان کوشتووە و زیانی قورسیان بە دەزگا ئەمنییەکانی ئەو وڵاتە گەیاندووە.

وتیشی، "حەسەن نەسروڵڵامان کوشت و رێگریمان لە داگیرکردنی ناوچەی جەلیل کرد، هەروەها چووینە ناو شاری غەززە و محەمەد دێف، ئیسماعیل هەنیە و یەحیا سینوار و هەموو ئەوانەمان کوشت کە دەستیان لە کۆمەڵکوژیی 7ی ئۆکتۆبەردا هەبوو".

لە بارەی بارمتە ئیسرائیلییەکان کە لەدەستی حەماس مابوونەوە ناتانیاهۆ ئاماژەی بەوەدا، "هەموو رفێندراوەکانیان لە غەززە گەڕاندووەتەوە و توانیویانە ئیسرائیل لە وێرانکاری رزگار بکەن".

سەرۆک وەزیرانی ئیسرائیل سەبارەت بە پەیوەندییەکانی وڵاتەکەی لەگەڵ ئەمریکا باسی لەوەکرد، "ئەمریکا هاوپەیمانێکی بەهێز و دێرینی ئیسرائیلە، هەرچەندە جار جارە ناکۆکیمان دەبێت، بەڵام لە کۆتاییدا ئێمە هاوبەش و هاوپەیمانێکی بەهێزی یەکترین".

PM:10:03:15/06/2026

ئه‌م بابه‌ته 200 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت