سبەینێ دادگاییکردنەکەی لاهور شێخ جەنگی و دەستگیرکراوانی لالەزار بەڕێوەناچێت

وێستگەنیوز- سازگار ئەحمەد

ئەمڕۆ سێشەممە 2ی حوزەیرانی 2026، دانا تەقیەددین، ئەندامی تیمی پارێزەرانی لاهور شێخ جەنگی بە وێستگەنیوزی راگەیاند، "سبەینێ چوارشەممە 3ی حوزەیرانی 2026، دادگاییکردنەکەی لاهور شێخ جەنگی و 11 دەستگیرکراوەکەی دیکەی لالەزار بەڕێوەناچێت، بەهۆی ئەوەی دۆسیەی بریکارەکەیان لە دادگای تاوانەکانی دووی سلێمانی نەماوە و رەوانەی دادگای پێداچوونەوە (ئیستئناف) کراوە".

ئاماژەی بەوەکرد، "تیمی پارێزەران سکاڵایەکیان تۆمار کردووە سەبارەت بەوەی دۆسیەکە لە دادگای تاوانەکانی دووی سلێمانی بەڕێوە نەچێت، ئێستا دۆسیەکە لەو دادگایە نەماوە و حەواڵەی دادگای پێداچوونەوەی ناوچەی سلێمانی کراوە بۆ تێهەڵچوونەوە و بڕیاردان لەسەری".

ئەوەشی خستەڕوو، "تا کاتی یەکلابوونەوەی سکاڵاکەی تیمی پارێزەران لەسەر گۆڕینی دادگاکە، رێوشوێنەکان لە دادگای پێشوودا رادەگیرێن و دوای یەکلابوونەوەی سکاڵاکە ئەوکاتە وادەی دیکە بۆ دادگاییکردن دیاریدەکرێت".

شەوی 22ی ئابی 2025، لە دەوروبەری هۆتێل لالەزار لە سلێمانی شەڕ لەنێوان هێزە ئەمنییەکانی سلێمانی و هێزەکانی سەر بە لاهور شێخ جەنگی روویدا و لە ئەنجامدا لاهور شێخ جەنگی و چەندین کەسی نزیک لێی دەستگیرکران.

AM:10:03:02/06/2026

ئه‌م بابه‌ته 268 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت