بارزانی و باوك كوڕ داوای ده‌ركردنی "میلیشیاكانی" شه‌نگال ده‌كه‌ن
لەكۆبونه‌وه‌كه‌دا گفتوگۆ لەبارەی پەرەپێدانی هەماهەنگیی ئەمنی نێوان حکومەتی هەرێمی کوردستان و حکومەتی فیدراڵی کراوە،
وێستگه نیوز-
وه‌زیری ناوخۆی عێراق، ئه‌مرۆ شه‌ممه، سه‌ردانی شاری هه‌ولێری كردوو به‌جیا له‌گه‌ڵ بارزانی باوك و كوڕ كۆبۆوه.
به‌پێی زانیارییه‌كان مه‌سعود بارزانی سه‌رۆكی پارتی دیموكراتی كوردستان و مه‌سرور بارزانی سه‌رۆك وه‌زیرانی هه‌رێمی كوردستان جه‌ختیان له‌جێبه‌جێكردنی ڕێكه‌وتنی سه‌ره‌تای ئه‌مساڵی شه‌نگال كردۆته‌وه كه تیایدا هاتووه نابێت هێزه چه‌كداره‌كانی پارتی كرێكارانی كوردستان و هیچ هێزێكی تر له‌و شاره هه‌بێت.
بەپێی راگەیێندراوێكی کۆبوونەوه‌كه‌ی مه‌سرور بارزانیدا لەكۆبونه‌وه‌كه‌دا گفتوگۆ لەبارەی پەرەپێدانی هەماهەنگیی ئەمنی نێوان حکومەتی هەرێمی کوردستان و حکومەتی فیدراڵی کراوە، بەتایبه‌تی کە "لەسەر پرسی هێرشە مووشەکییەکەی سەر هەولێر، لە ئەنجامی هەماهەنگیی باشی نێوان حکومەتی هەرێمی کوردستان و حکومەتی فیدراڵی، ئەنجامی باش بەدەستهاتوون".
لە دیدارەکەدا هەروەها ،جەخت لە گرنگیی "جێبەجێکردنی رێککەوتننامەی شنگال و دەرچوونی میلیشا مه‌و هێزە چەکدارە نایاساییەکان لە دەڤەرەکە" کراوە.
سەرۆکوەزیرانی هەرێمی کوردستان ئاماژەی بە بەردەوامیی سیاسەتی گۆڕینی دیموگرافی و دەستدرێژیکردنەسەر هاووڵاتییانی کورد و داگیرکردنی زەویوزارەکانیان لە کەرکووک و ناوچە کوردستانییەکانی دەرەوەی ئیدارەی هەرێمی کوردستان کرد و رایگەیاند: "ئەمجۆرە دۆخە نائاسایی و نادەستوورییە، لە بەرژەوەندیی خەڵکی عێراق نییە و پێویستە رێگریی لێ بکرێت".
هه‌ر ئه‌مرۆ ش لە سەلاحەددین مەسعود بارزانی پێشوازی لە عوسمان غانمی وەزیری ناوخۆی حكوومەتی فیدڕاڵی عێراق كرد.
لە كۆبوونەوەیەك دا بارودۆخی ئەمنی و دواپێشهاتەكانی عێراق و هەماهەنگیی نێوان هەرێمی كوردستان و حكومەتی عێراقی فیدڕاڵ لە رووبەڕووبوونەوەی تەحەددیاتی ئەمنی و تیرۆر تاوتوێ كرا و هەروەها جەخت لە سەر جێبەجێكردنی رێككەوتنی ئاساییكردنەوەی بارودۆخی شنگال كرایەوە.
پەیوەندییەكانی نێوان هەرێمی كوردستان و حكوومەتی عێراقی فیدڕاڵ تەوەرێكی تری ئەو دانیشتنە بوو.
PM:04:36:27/02/2021
ئه‌م بابه‌ته 792
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت