ئاوات شێخ جه‌ناب: له‌گه‌ڵ به‌غدا رێككه‌وتووین رۆژانه‌ 250 هه‌زار به‌رمیل نه‌وت راده‌ست بكه‌ین

‌ئاوات شێخ جه‌ناب

وێستگه‌ نیوز ـ
وەزیری‌ دارایی‌ و ئابووری حکومەتی هەرێمی كوردستان رایدەگەیەنێت، لەگەڵ بەغدا رێککەوتوون کە رۆژانە 250 هەزار بەرمیل نەوت رادەست بکەن، بەمەرجی‌ ناردنی‌ سەرجەم شایستە داراییەکانی‌ هەرێم لەلایەن بەغداوە.

ئاوات شێخ جه‌ناب، وه‌زیری دارایی و ئابووری حكومه‌تی هه‌رێمی كوردستان به‌ ماڵپه‌ری سبه‌ی سه‌ر به‌ بزووتنه‌وه‌ی گۆڕانی راگه‌یاندووه‌: ماوەی‌ پێنج ساڵە عیراق هیچ بڕە پارەیەکی‌ مووچەی‌ بۆ هەرێمی‌ کوردستان زیاد نەکردوە و تەنها مووچەی‌ 682 هەزار مووچەخۆر رەوانەی‌ هەرێم دەکات، لەکاتێکدا هەرێم زیاتر لە یەک ملیۆن و 200 هەزار مووچەخۆری‌ هەیە.

ئاوات شێخ جه‌ناب، له‌ دیمانه‌یه‌كدا له‌گه‌ڵ ماڵپه‌ری سه‌ر به‌ بزووتنه‌وه‌ی گۆڕان، كه‌ وه‌ك ئاماژه‌یان پێداوه‌ ئێواره‌ی ئه‌مڕۆ بڵاوده‌كرێته‌وه‌، دەڵێت: "بەمزوانە شاندێکی‌ حکومەتی‌ هەرێم سەردانی‌ بەغدا دەکات و گفتوگۆ لەبارەی‌ هەموو پرسە گرنگەکانی‌ نێوان هەردولا دەکرێت".

دەقی دیمانەکە

-هەوڵەکانی ئێوە بۆ کردنەوە و بە نێودەوڵەتیکردنی مەرزی سەیران بەن گەیشتوە بە کوێ؟

ئاوات شێخ جەناب: لەئێستادا تاوتوێی دۆخەکە دەکەین، تاوەکو بزانین کە ئایا مەرزەکە بکرێتەوە یاخود بە داخراوی بمێنێتەوە، داخوازی خەڵک ئەوەیە مەرزەکە بکرێتەوە و ئێمەش تاوتوێی بابەتەکە دەکەین، هەروەها ئێستا ئەولەویەتی حکومەت روبەڕوبونەوەی کۆرۆنایە، ئەوەش وایکردوە مەرزەکە دابخەین، بەردەوامیش دەبین لە هەوڵەکان بۆ کەمکردنەوەی فشارەکانی سەر باروگوزەرانی هاوڵاتیان و ئەوانەی بژێوی ژیانیان لەسەر ئەم مەرزەیە.

سەبارەت بە نێودەوڵەتیکردنی مەرزەکەش، دوای سەردانی کونسوڵی ئێران بۆلای ئێمە، پێی راگەیاندین کە رێکارە یاساییەکانی بە نێودەوڵەتیکردنی مەرزەکە تەواو بوە، بەڵام نوسراوەکە بەدەست ئێمە نەگەیشتوە بۆ ئەوەی بڕیاری لەبارەوە بدەین.

-کردنەوەی ئەم مەرزە چ کاریگەرییەکی دەبێت لەسەر داهاتی هەرێم؟

ئاوات جەناب نوری: بە دڵنیاییەوە کردنەوەی مەرزەکە بۆ خەڵک و هاوردەکردنی خۆراک و کەلوپەل گرنگە، بەڵام ئامانجی سەرەکی بۆ داهات نیە، چونکە ئەگەر بزانین کردنەوەی مەرزەکە مەترسی دروست ناکات، ئەوا مەرزەکە دەکرێتەوە.

-بڕیار وایە شاندێکی هەرێم سەردانی بەغدا بکات، کەی سەردانەکە دەکرێت؟
ئاوات جەناب نوری: وەفدەکەی هەرێم ئامادەیە سەردانی بەغدا بکات، ماوەی دو مانگە داوامان کردوە سەردانی بەغدا بکەین، بەڵام بەهۆی دۆخی سیاسی بەغداوە سەردانەکە ئەنجام نەدراوە، ئێستاش وەفدەکەی ئێمە ئامادەیە و لەگەڵ حکومەتی بەغدا لە پەیوەندیدان بۆ دیاریکردنی وادەیەک و بەمنزیکانە سەردانی بەغدا دەکەین.

-گفتوگۆ لەسەر چی دەکەن؟

ئاوات جەناب نوری: شاندەکەی هەرێم بۆ گفتوگۆ لەسەر سەرجەم پرسەکان دەچێتە بەغدا، ئەوەی پەیوەیستە بە بودجە و ناوچە دابڕێندراوەکان و موچەی فەرمانبەران و وادەی ناردنی پارەی فەرمانبەران، چونکە هەر جاری بە رێککەوتێک پارەکە دەگاتە هەرێم و گەیشتە ئەو رادەیەی هەندێک کەس بە سەهو کاتێک موچەی مانگی دو دواکەوتبو، هاتبوە مانگی سێ، هەروەها مانگی سێ-ش لە رۆژی (26/3/2020) رەوانە کرا، بۆیە دەمانەوێت ئەو گرفتانە نەهێڵین.

داخوازی ئێمە ئەوەیە پشکی هەرێم بکرێتەوە بە (17٪)، بەڵام رێگری هەیە، هەروەها راستییەکیش هەیە بە درێژاریی ساڵی (2019) بەغدا پارەی (682) هەزار فەرمانبەری رەوانە کردوە و بەغدا کەمترخەمی زۆری بەرامبەر بە کورد کردوە، تەنانەت رێژەی (12٪)شی بۆ هەرێم نەناردوە لە بەشە بودجە، بەڵکو رێژەکە (5٪ بۆ 6٪) بوە.

ژمارەی موچەخۆرانی هەرێم زیاتر لە یەک ملیۆن و (200) هەزار کەسە و بەغداش بڕی (441) ملیار دینار رەوانە دەکات کە پارەی (682) هەزار فەرمانبەرە.

هەرێم ئامادەیە لەبەرامبەر ناردنی بودجە، نەوت رادەستی بەغدا بکات؟

ئاوات جەناب نوری: بەپێی رێککەوتنەکەمان بۆ ساڵی (2020)، ئێمە ئامادەین بڕی (250) هەزار بەرمیل نەوت رادەستی بەغدا بکەین، بەو مەرجەی کە بەغدا تەواوی شایستە داراییەکانی هەرێم رەوانە بکات و موچەی پێشمەرگە رەوانە بکەن، بەڵام ئەوەیە هەیە ماوەی پێنج ساڵە حکومەتی عێراق یەک دیناری بۆ موچەخۆرانی هەرێم زیاد نەکردوە و هەر (682) هەزار فەرمانبەرەکەیە.

هــ. ر