په‌رله‌مانی كوردستان پڕۆژه‌ یاسای چاكسازی ده‌خاته‌ ده‌نگدانه‌وه‌

‌دانیشتنی پەرلەمانی کوردستان لەسەر پڕۆژە یاسای چاکسازی

وێستگە نیوز ـ
پەرلەمانی كوردستان خوێندنەوەی دووەمی بۆ پڕۆژەیاسای چاكسازی كرد و بڕیارە رۆژی پێنجشەممە پڕۆژەیاساكە بخرێتە دەنگدانەوە.


له‌ كۆبوونه‌وه‌ی په‌رله‌مانی كوردستاندا كه‌ دوێنێ دووشەممە ده‌ستیپێكردەوە و تا بەرەبەیانی ئەمڕۆ سێشه‌ممه‌ بەردەوام بوو، خوێندنەوەی دووەم بۆ سەرجەم ماددەكانی پڕۆژەیاسای چاكسازی كراو بڕیاریشە رۆژی پێنجشەممە 16ی كانوونی دووه‌می 2020، پڕۆژەیاساكە بخرێتە دەنگدانەوە.

ماڵپەڕی فەرمی پەرلەمانی كوردستان بڵاویكردووه‌ته‌وه‌: دوای ته‌واوكردنی گفتوگۆكانی خوێندنه‌وه‌ی دووه‌م بۆ پڕۆژه‌یاسای‌ چاكسازی له‌ خانه‌نشینی مووچه ‌و ده‌رماڵه ‌و به‌خشین و ئیمتیازاته‌كانی تر، سه‌رۆكی په‌رله‌مان لیژنه‌ی یاسایی و لیژنه‌ی تایبه‌تمه‌نده‌كانی راسپارد سه‌ر له‌به‌یانی سێشه‌ممه‌ 15ی كانوونی دووه‌م، به ‌ئاماده‌بوونی نوێنه‌رانی حكومه‌تی هه‌رێم، كۆببنه‌وه‌ بۆ دارشتنه‌وه‌و پوختكردنه‌وه‌ی پێشنیاز و سەرنجه‌كانی په‌رله‌مانتاران له‌باره‌ی مادده‌و بڕگه‌كانی پرۆژه‌كه ‌و ئاماده‌كردنی راپۆرتی كۆتایی بۆ ئه‌نجامدانی رێككاره‌ یاساییه‌كانی.

سه‌رۆكی په‌رله‌مان رایگەیاندووە: "كاتژمێر 11ی پێشنیوه‌رۆی رۆژی پێنجشه‌ممه‌ دانیشتنی په‌رله‌مانی كوردستان به‌رێوه‌ده‌چێت بۆ ده‌نگدان له‌سه‌ر پڕۆژه‌یاسای‌ چاكسازی".

ماوه‌ی دوو رۆژه‌ په‌رله‌مانی كوردستان سه‌رقاڵی ئه‌نجامدانی خوێندنه‌وه‌ی دووه‌مه‌ بۆ پڕۆژه‌ یاسای چاكسازی و دوێنی گفتوگۆكان له‌ ماده‌ی حه‌وته‌می پڕۆژه‌ یاساكه‌دا کە تایبەتە بە مووچەی پلەباڵاکان زۆرترین كاتی بردو گرژی كه‌وته‌ نێوان په‌رله‌مانتارێكی نه‌وه‌ی نوێی و په‌رله‌مانتارێكی فراكسیۆنی پارتییه‌وه‌ و به‌هۆیه‌وه‌ دانیشتنه‌كه‌ بۆ ماوه‌یه‌ك هه‌ڵگیرا.


AM:08:48:14/01/2020


ئه‌م بابه‌ته 1400 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت

زۆرترین خوێندراو