هێمن هه‌ورامی: پارتی ناوی کاندید پێشکەشی کۆمسیۆن ناکات
دیمەنێک لە دیدارەکە
وێستگه‌نیوزـ
هێمن هەورامی، ئەندامی مەکتەبی سیاسی پارتی دیموکراتی کوردستان جەخت دەکاتەوە لەوەی حزبه‌كه‌ی لیستی کاندید بۆ هەڵبژاردنی پەرلەمانی کوردستان پێشکەشی کۆمسیۆن ناکات.
ئەمڕۆ پێنجشەممە 28ی ئاگاداری 2024، هێمن هەورامی، ئەندامی مەکتەبی سیاسی پارتی لە پیرمام پێشوازی لە مانۆج ماسیو، بەرێوەبەری کاروباری سیاسی و شیکاریی یۆنامی لە عێراق کرد.
هێمن هەورامی رایگەیاند، لە دیدارەکەدا زۆر بە روونی روانگەو ھەڵوێستی پارتی دیموکراتی کوردستان لەسەر دۆخی سیاسی و بریارە نادەستوورییەکانی دادگای فیدراڵی بۆ شیکردەوە.
وتیشی: "لە بارەی ھەڵبژاردنەکانەوە، جەختمان لەوە کردەوە کە لە ماوەی دوو ساڵی رابردوودا وەک پارتی ھەموو ھەوڵێکماندا ھەڵبژاردنەکان لە کاتی خۆیاندا بکرێت و لایەنی دیکە رێگرییان دەکرد و پەنایان بۆ دادگای نادەستووری برد و لەوێشەوە بڕیاری سیاسی نەک یاسایی بەرامبەر ھەرێمی کوردستان دەردەکرا".
ئەوەشی خستەڕوو کە هاوکات لەگەڵ ئەو دۆخەدا "گوشاری ئابووری و برسیکردنی خەڵکی کوردستان و پەلاماری درۆن و مووشەکیان بەرامبەر ھەرێمی کوردستان بە گشتی و ھەولێر بە تایبەتی بەکار دەھێنا".
هێمن هەورامی باسی له‌وه‌شكرد: "بەیاننامەی مەکتەبی سیاسی پارتیمان بە روونی بۆ شیکردنەوە کە بەشداری ھەڵبژاردنێک نابین پێش وەختە وەھا دیزاین کرا بێت بۆ تێکدانی ھەرێمی کوردستان و شکاندنی پارتی بێت و لە رێگای دادگایەکی نادەستوورییەوە یاساکانی ھەرێم ھەموار بکەنەوە".
جەختیشیکردەوە کە، "پارتی دیموکرتی کوردستان لیستی کاندید پێشکەش ناکات بەو جۆرە ھەڵبژاردنە کە بە بڕیاری سیاسی و نادەستووری دادگای فیدراڵی بێت".
ئەمەش لە کاتێکدایە ئەمڕۆ کۆمسیۆنی باڵای سەربەخۆی هەڵبژاردنەکانی عێراق بڕیاری دا وادەی پێشکەشکردنی ناوی کاندیدەکان بۆ هەڵبژاردنی پەرلەمانی کوردستان تا 31ی ئەم مانگە درێژ بکاتەوە.
PM:02:22:28/03/2024
ئه‌م بابه‌ته 2272
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت