درەیک بە ئەلبوومێکی نوێوە دەگەڕێتەوە؛ "ICEMAN" لە ناوەڕاستی مانگی ئایاردا بڵاودەبێتەوە

وێستگە ستایل - سۆلین عوسمان

هاندەران و گوێگرانی مۆسیقای ڕاپ و هیپ هۆپ لە سەرانسەری جیهان، لە چاوەڕوانییەکی بێوێنەدان بۆ بڵاوبوونەوەی نوێترین کاری هونەری ئەستێرەی کەنەدی، درەیک، کە بڕیارە ریکۆردەکان بشکێنێت.

بە شێوەیەکی فەرمی ڕاگەیەندراوە کە درەیک، ئەلبوومی داهاتووی خۆی بە ناونیشانی "ICEMAN" لە ڕێکەوتی ١٥ی ئایاری داهاتوو بڵاودەکاتەوە، کە چاوەڕوان دەکرێت شێوازێکی جیاواز و نوێ لە مۆسیقای تێدا بێت.

ئەم ئەلبوومە نوێیە لە کاتێکدایە کە درەیک هەمیشە لە لوتکەی لیستی پڕفرۆشترینەکاندا بووە و ئەمجارەش بە ناونیشانی "پیاوی سەهۆڵین" دەیەوێت جەماوەرەکەی سەرسام بکات و پێگەی خۆی وەک یەکێک لە کاریگەرترین هونەرمەندەکانی سەدە بەهێزتر بکات.

درەیک کە خاوەنی چەندین خەڵاتی جیهانییە و یەکێکە لە پڕداهاتترین هونەرمەندەکان، هەمیشە لە ڕێگەی ئەلبوومەکانییەوە باس لە چیرۆکە کەسییەکان و ململانێکانی ژیانی دەکات، ئەمەش وایکردووە هەوادارانی بە پەرۆشەوە چاوەڕێی ناوەڕۆکی "ICEMAN" بن.

بڵاوکردنەوەی ئەم ئەلبوومە لە ناوەڕاستی بەهاردا، دەبێتە یەکێک لە گەورەترین ڕووداوە هونەرییەکانی ساڵ و پێشبینی دەکرێت لە یەکەم ڕۆژەکانی بڵاوبوونەوەیدا پلەکانی یەکەمی پلاتفۆرمە مۆسیقییەکان داگیر بکات.

سەرچاوە: گۆڤاری Billboard و پلاتفۆرمی فەرمی OVO Sound

PM:09:08:22/04/2026

ئه‌م بابه‌ته 28 جار خوێنراوه‌ته‌وه‌‌