ڤاکسینە کەسییەکان بۆ چارەسەری شێرپەنجە هیوایەکی گەورە بۆ نەخۆشانی میلانۆما دەخەنە ڕوو

وێستگە ستایل - سۆلین عوسمان

ڤاکسینێکی تایبەتی شێرپەنجە کە لەلایەن کۆمپانیای "Moderna" بە هاوبەشی لەگەڵ

"Merck" بە تەکنەلۆژیای mRNA پەرەی پێدراوە، ئەنجامی زۆر باشی لە نەخۆشانی میلانۆما (شێرپەنجەی پێست) هەبووە، ئەمەش هیوای ئەوە زیاد دەکات کە ڤاکسینەکان ببنە بەشێکی گرنگ لە چارەسەری شێرپەنجە لە داهاتوودا.

ئەم ڕێگەیە جیاوازە لە ڤاکسینە تەقلیدییەکان کە بۆ ڕێگری لە نەخۆشییە گوازراوەکانن؛ بەڵکو چارەسەرەکە بەپێی ئەو بازدانە (Mutations) دروست دەکرێت کە لە تومۆری هەر نەخۆشێکدا دەدۆزرێتەوە. ئامانجی ڤاکسینەکە ئەوەیە یارمەتی کۆئەندامی بەرگری بدات تا خانە شێرپەنجەییەکان بناسێتەوە و هێرشیان بکاتە سەر.

لە تاقیکردنەوەیەکی کلینیکی فراواندا کە زیاتر لە ١٠٠٠ نەخۆشی تێدا بەشدار بووە، تێکەڵکردنی ئەم ڤاکسینە لەگەڵ دەرمانی کیتروودا (Keytruda)، مەترسی گەڕانەوە یان بڵاوبوونەوەی شێرپەنجەی زۆر کەم کردووەتەوە بەراورد بە چارەسەرە ئاساییەکان.

ئێستا توێژەران دەپشکنن ئایا هەمان ڕێگە بۆ جۆرەکانی تری شێرپەنجەی وەک سییەکان، میزڵدان، گورچیلە، پەنکریاس و گەدە کارا دەبێت یان نا.

ڤاکسینە کەسییەکانی شێرپەنجە بەشێکن لە بواری چارەسەری بەرگری (Immunotherapy). لە جیاتی لەناوبردنی ڕاستەوخۆی تومۆرەکان بە کیمیایی یان تیشک، ئەم ستراتیژە هەوڵدەدات کۆئەندامی بەرگری ڕابهێنێت بۆ دیاریکردنی ئامانجە تایبەتەکانی شێرپەنجە.

زانایان هۆشداری دەدەن کە ئەنجامە سەرەتاییەکان بەو واتایە نین کە چارەسەرەکە بۆ هەموو نەخۆشێک ئامادەیە، بەڵکو پێویستە توێژینەوەی زیاتر و هەڵسەنگاندنی یاسایی بکرێت.

بەڵام ئەم ئەنجامانە وەک هەنگاوێکی زۆر گرنگ بەرەو چارەسەرکردنی شێرپەنجە لە ڕێگەی چارەسەری بەرگریی تایبەتمەندەوە دەبینرێن.

ڕۆیتەرز، ١٩ی ئابی ٢٠٢٦.

PM:11:41:24/08/2026

ئه‌م بابه‌ته 128 جار خوێنراوه‌ته‌وه‌‌